TIKLO ang duha ka mga gituohang karnaper human gihimo ang joint operation sa mga sakop sa City Intelligence and Detective Unit (Cidu) sa Cagayan de Oro City Police Office (Cocpo) ug Iligan City Police Office niadtong Huwebes mga alas 11:45 sa gabii didto sa siyudad sa Iligan.

Nagtingkagol sa prisuhan sa Maharlika Detention Cell ning siyudad ang duha ka mga suspek nga mao sila si Acob P. Maraig, 24, minyo, ug kaubang si Ali M. Asgar, 20, ulitawo pulos mga residente sa Madalogan, Lanao del Sur.

Post your reaction to the Manila hostage crisis

Si PO1 Joan Galvez sa Cidu nga nahinabi sa Sun.Star Superbalita niingon nga nasikop ang mga suspetsado tungod usab sa kooperasyon sa mga polis gikan sa Iligan.

Nasayran nga ang mga suspetsado maoy gitumbok nga suspetsado sa pagpangarnap sa motorsiklo ni Crisante Monsanto, nga taga lungsod sa Tagoloan, Misamis Oriental.

Nakumpiska usab gikan sa mga suspek ang motorsiklo nga maoy gisakyan dihang gigukod sa kapolisan.

Gani ang duha ka mga suspetsado miangkon nga usa sila sa mga responsable sa sunod-sunod nga pagpangarnap nga natigayon dili lamang sa siyudad sa Iligan apan apil ning siyudad.

Gikatakdang pasakaan og kasong carnapping ang duha ka mga suspetsado kagahapong adlawa. (Stephanie V. Berganio)