NAKABSAN sa kinabuhi ang usa ka sundalo atol sa engkwentro niadtong Lunes mga alas 12:30 sa udto sa Barangay Bangbang, lungsod sa Medina, Misamis Oriental.
Giila ang namatay nga mao si Private First Class Roel Llamado, taga Barangay Lunao, siyudad sa Gingoog, Misamis Oriental.
Gikumpirma ni Lieutenant Colonel Eugene Osias, kinsa tigpapamaba 4th Infantry Division (4ID) Philippine Army sa Camp Evangelista ning siyudad sa Cagayan de Oro, nga na-engkwentro sa maong lugar ang gituohang mga sakop sa New People’s Army (NPA) partikular ang miyembro sa Guerilla Front 4B.
Sakop si Llamado sa 58th Infantry Battalion ug nasagubang nila ang pipila ka sakop sa NPA nga sa pagsulat ning balita wala pa gikabutyag kung pila ka miyembro ang na-engkwentro.
Giingong pipila usab ang samdan sa sakop sa NPA human namatikdan sa dapit ang mga lama sa dugo.
Kahadlok usab ang gibati sa mga residente sa maong lungsod tungod kay presko pa alang kanila ang nahitabong pagpanulong sa mga sakop sa NPA nga maoy hinungdan sa kamatayon sa usa ka polis sa maong dapit.
Ang patayng lawas gihatagan og pasidungog ug kasubo ang gibati usab sa mga kasundalohan sa nga sakop sa 4ID. (SVB)