HUMAN sa duguong hostage crisis, lagmit nakita na karon ni Presidente Noynoy Aquino kinsa sa mga sakop sa iyang gabinete ang mapiyalan ug takus sa gisangon niya nga posisyon.

Hayan duna nay ideya karon si Presidente Noy sa abilidad sa iyang mga napili nga mga tawo nga gibutang sa mga sensitibong posisyon.

Post your reaction to the Manila hostage crisis

Ang usa ka Presidente bisan unsa ka-papyolar kun ang iyang mga sakop "huyang og baruganan" mapagan ra gihapon siya. Masuwayan gyud ang disposisyon sa mga opisyal ilabi na sa panahon sa emerhensiya, sama niadtong nahitabo nga hostage crisis.

Pananglitan si Department of Interior Secretary Jesse Robredo. Si Secretary Robredo, isip kalihim sa DILG gamhanan. Gamhanan siya tungod kay anaa ilawom sa iyang Departamento ang Philippine National Police.

Apan unsay iyang kontribusyon nga nahatag dihang nahitabo ang krisis didto sa Quirino Grandstand. Apil ba siya niadtong gatusan ka mga nanan-aw sa hitabo sa tv coverage?

Isip kalilhim sa DILG makahimo siya sa pagmando sa pulis unsay maayong buhaton gawas nga aduna siya'y gahom sa pagpakanaug og bililhong desisyon.

Unsay "demand" ni Senior Inspector Rolando Mendoza? Ibalik siya sa puwesto human giputbol sa Ombudsman.

Hayan nga sakto si Senador Migs Zubiri kinsa miingon nga kun siya pa ang DILG secretary sultihan niya si Mendoza nga ibalik siya sa katungdanan ubos sa "floating status" samtang reboyohon ang iyang kaso.

Kun nahunahunaan kini ni Robredo di unta kita bugbog-sarado sa pagtulisok sa laing laing nasud karong panahona.

Lagmit nga dunay laing departamento nga angay butangan kang Robredo, apan di ang DILG.