MORA'G magnet ang TV sa niaging mga adlaw. Duha ka pasundayag nga di tingali makalimtan sa katawhan. Ang una mao ang gitawag nga Manila hostage crisis didto sa Quirino grandstand ang lugar diin di pa lang dugay nihural si P-Noy isip pangulo.
Ang ikaduha mao ang live coverage sa gihimong 2010 Miss Universe Pageant sa Las Vegas diin nasungkit ni Maria Venus Raj sa Pilipinas ang ika-4 nga puwesto sa 24 ka misalmot sa tinuig nga contest.
Samtang naghudyaka ang katawhang Pinoy sa talagsaong nakuha sa atong kababayan, nagbakho sab sa kaulaw ug kasubo ang kadaghanan nga nakasaksi sa hostage taking.
Usa ka tourist bus nga lulan ang mga turista gikan sa Hong Kong ang gisakyan sa nabughang S/Insp. Rolando Mendoza ug gihimo niyang taming aron madunggan ang iyang demanda nga ibalik siya sa puwesto.
Sa niaging tuig, usa si Mendoza sa mga kapulisan sa Manila nga gipalagpot sa puwesto tungod kuno sa kasong extortion ug uban pang kaso. Di na pod siya makatrabaho sa bisan unsang ahensiya sa gobyerno. Mga kaso kini nga di madawat ni Mendoza busa buot niyang ibalik siya sa serbisyo sa shortcut nga paagi ginamit ang buka sa iyang pusil.
Tuod man nandunggan siya sa kagamhanan ug sa katawhan tungod sa coverage sa TV. Napatay ug nasamdan niya ang kadaghanan sa iyang 17 ka hostages ug usa ka batang usisiro.
Sulod sa 11 ka oras nakita sa katawhan ang abilidad sa atong mga Special Weapons and Tactics (SWAT) Team. Nasaksihan nila nga mora'g mga bata nga nagdula og giyera-giyera nga way mga alamag kung unsaon pagbuntog sa nag-inusarang kaaway nga ila ra usab nga kanhi kauban sa buhat.
Tungod niini, nagpungasi ang batikos nga ilang nadawat gikan sa pamilya sa mga biktima ug sa katawhan mismo lakip na sa Kongreso ug Senado.
Nikalat pa ang mga SWAT jokes sa internet ug nahimong sumsuman sila sa barberohan ug palengke. Nahimong Special Wait Action Team, Silang mga Walay Agi Team, Samahan ng Walang Asahan ang Tao, ug uban pa.
Busa pipila ka opisyal nga niapil sa operasyon sisante sa trabaho o giimbestigahan pa karon.
Naatol pa nga ang PNP nag-atubang sa dakong isyu sa "torture video" sa Tondo nga nikuyanap sab sa mga inilang TV networks sa kalibutan.
Bisan nibutyag ang Bangko Sentral nga wala nakaapekto ang hitabo sa presyo sa peso ug dolyar, nisibat gidayon ang gatusan ka mga turistang gikan sa Hong Kong ug China tungod niini.
Gibalita sab nga gikanselar sa halos 500 ka nga taga didto ang ilang pag-anhi sa Pilipinas human nipaguwa og travel advisory ang Hong Kong government nga gidili pag-anhi dinhi. Gibanabanaan sa Department of Tourism nga mokunhod og mga 10% ang ihap sa turistang moduaw dinhi sa nasud karong tuiga.
Usa ako sa nakasaway sa owat nga gibuhat sa SWAT sa hostage crisis. Akong maaninaw nga kung ingon niini ang abilidad sa elite force kuno nga kanunay nang nakaagi og training, unsa pa kaha ang atong mga ordinaryong kapulisan sa mga police stations sa nasud? Hinuon nisalig kita nga usbon kini sa PNP.