HUMAN sa hostage crisis sa Rizal Park, Manila niadtong miaging Lunes nahitabo ang "blame game." Nagtinudloay kita kinsay sad-an. Mitumaw nga gibasul sa hitabo dili lamang ang pulis apan ang media sab. Gibasul ang media tungod kay nakita sa hostage taker nga si S/Ins. Rolando Mendoza sa tv ang gibuhat sa kapulisan sa iyang igsuong pulis nga si Spo2 Gregorio nga gidakop sa mga pulis ug wa sab natago kaniya ang kalihukan sa mga sakop sa assault team..
Akong mahinumdoman ang nahitabo dinhi sa siyudad sa Davao nga hostage crisis niadtong 1989.
Gitawag kadto og "Felipe Poguy Hostage Drama" nga nahitabo gikan sa Agosto 13-15, 1989.
Ang sibyahanang DxUM sa UM Broadcasting Network uban sa 'guidance and support' sa among boss nga si Mr. Guillermo P. Torres Jr., naghimo og tulo ka adlaw nga live coverage sa talagsaong hitabo.
Ako ang milingkod niadto nga anchorman ug akong kauban ang mga labing maayong magsisibya nga nagsilbing reporter nga sila si Rene B. Lumawag, anhing Ferdie Lintuan, Gerry Tan, Arnel Melindo, Leo Daugdaug ug Dodong Atillo.
Sila maoy akong gi-assign palibot sa Kampo Leonor nga maoy eksena sa hostage drama nga gihimo ni Pugoy kauban ang ubang mga priso. Mga bihag nila naglakip sa mga pastor ug mga babayeng langyaw nga miadto sa ilang detention cell aron unta pagsangyaw sa mga maayong pulong.
Apan imbis maminaw kanila, gi-hostage hinuon sila sa mga piniriso. Samtang naglami na ang among coverage tungod kay daghan ang naminaw kanamo, miabot kanako ang hangyo gikan ni Mayor Rody Duterte ug Kongresista Jess Dureza nga kung pwede "dili i-report ang troop movement."
Gipasabot sab ako nga mga priso duna diay transistor radio ug naminaw sab sa among broadcast.
Ang mensahe ako dayong gipahonghong ngadto sa akong mga kauban pinaagi sa akong production assistant.
Nakatimaho ako nga duna nay buhaton ang mga otoridad mao nga akong gipasultihan sa sekreto nga paagi ang mga reporters nga dili ipasibya ang ang ngan sa posibling maigo sa mga bala gawas lamang sa paghulagway kun sila babaye ba o lalaki.Naglikay ako nga masayop kami ug buot nako nga mga otoridad ra ang mosulti niini.
Mga otoridad dihang nakita nga di na maminaw og rason ang mga priso ug human usab nila mahibaw-i nga ubang babaye gipanglogos na ug nakatakdang pamatyon, miatake na.
Ang resulta, samtang adunay pipila ka langyaw nga napatay, apan daghan ang naluwas. Hinuon, todas tanan ang mga priso nga nalambigit sa hostage drama.
Sa nahitabo sa Rizal Park, Manila niadtong Lunes, sama sa way nakigsulti sa media nga mga tawo sa MalacaƱang kun asa sila kutob sa ilang coverage gawas lamang niadtong hangyo nga ipapalong ang mga suga sa mga tv cameramen kay suwaw ug di makakita ang mga pulis.
Nakasiguro kita nga mga sakop sa media maminaw kun gi-estoryahan pa sila.