GITAKDA nga mobalhin na sa ilang bag-o ug modernong municipal hall ang mga opisyal ug empleyado sa lokal nga kagamhanan sa lungsod sa Asuncion, Davao del Norte.

Sumala kang Mayor Marcelino Perandos nga human sa kapin duha ka tuig nga pagpatrabaho, nahuman ug mahimo nang kabalhinan ang ilang bag-ong municipal hall nga nahimutang sa poblacion sa Septyembre 20.

Post your reaction to the Manila hostage crisis

"Karong umaabot nga Septyembre 20 mobalhin na gayud kita sa atong bag-ong municipal hall," sulti ni Parenas sa paghinabi sa Superbalita.

Matud ni Parenas nga sa pagkakaron ilang nang giandam ang mga gamit alang sa matag buhatan ug migahin og pundo ang lokal nga kagamhanan alang niini.

Ang lungsod sa Asuncion migahin og kapin P16 milyones alang sa pagtugod sa maong gambalay.

Gisulti sab ni Parenas nga angay ipasigarbo sa katawhan ang ilang nindot nga municipal hall nga gibarog tungod sa ilang pagpaningkamot.

"Angay kitang taga Asuncion atong ipasigarbo ang atong municipal hall nga barato apan nindot ug puwede natong mapasigarbo," dugang ni Parenas.

Dugay nga panahon nga nag-antus ang lokal nga kagamhanan sa lungsod sa Asuncion sa ilang daang municipal hall.

Human sa municipal hall isunod sab sa lokal nga kagamhanan ang pagpatiwas sa ilang municipal gym tapad lamang sa municipal hall. (Marvin Pineda)