MAGSUONG lalaki nga nag-atubang og kasong kawat didto sa lungsod sa Don Marcelino, Davao del Sur mitahan sa mga otoridad.
Subay sa gipadangat nga taho sa Davao del Sur Provincial Police Office (DDSPPO), nasayran nga mga suspek duna nay warrant of arrest nga gipagula sa Regional Trial Court (RTC) Branch 18.
Giila sa kapulisan ang mga nisurender nga mao sila si Suay, 26, ug Joan Munsing, 24, pulos minyo ug mga lumolupyo sa Barangay Kiobog, Don Marcelino.
Banda alas 5 sa hapon sa miaging adlaw, nidangop sa buhatan sa kapulisan ang magsuong Munsing human masayod nga gitakda ang pagsikop kanila.
Gimando ni Judge Rodolfo Escovilla sa RTC 11 Judicial Region sa siyudad sa Digos ang pagsikop sa mga suspek kinsa nag-atubang sa criminal case number 8 (98) o kasong "qualified theft."
Sa pikas bahin, gisikop sa kapulisan ang usa ka lalaking nag-atubang og kasong "acts of lasciviousness" didto sa dakbayan sa Digos.
Ang nasikop giila nga mao si Cristeto Flores, 38, minyo ug laborer didto sa Purok Sineguelas, Barangay Upper Badiang Sinawilan sa dakbayan.
Nag-atubang og kaso ang dinakpan nga nakadoket sa criminal case number 87 (10).
Ang warrant of arrest giisyu ni Judge Norma Rusty-Calatrava sa 5th Municipal Circuit Trial Court (MCTC), pinetsahan Hulyo 26 ning tuiga.
Sila si PO1 Reyson Bucol ug PO1 Roger Cambarijan maoy nagbitbit sa orden de aresto alang sa suspek.
Ang suspek gipriso na sa selda sa kapulisan. (Dondon Dinoy)