USA ka 22 anyos nga tindera ang nagpakamatay pinaagi sa paghikot og nylon nga pisi ug nagbitay sa iyang kaugalingon.
Gihulagway nga depresyon ang gituohang hinungdan sa pagpakamatay sa biktima kay duha ka bulan na kining mabdos nga giila lang sa ngan nga Lita, dalaga, sa Barangay Latian, lungsod sa Kiblawan, Davao del Sur.
Ang mismong amahan sa biktima nga mao si Pedro, hingkod ang pangedaron, maoy nakakaplag sa iyang anak nga nagbitay ug wa nay kinabuhi sud sa iyang lawak.
Nilutaw sa inisyal nga imbestigasyon ni PO3 Allan Dave Parantar nga alas 6 sa sayong kabuntagon niadtong Huwebes nahitabo ang insidente ug nadiskobrehan kini sa sayong kagabhion.
Nigahi na ang biktima sa dihang gibadbaran sa nylon ang iyang liog.
Gisulti sa kapulisan nga depresyon maoy gituohang hinungdan aron nga magtukmod sa biktima nga magpakamatay human gisibatan sa iyang uyab.
Nagtuo ang mga imbestigador nga nauwaw ang dalaga tungod sa iyang gidangatan nga nagbuntis.
Ang biktima nagbilin pa og suicide letter nga nagkanayon nga di niya madawat ang pagbiay-biay kaniya pinaagi sa nikatap nga istorya sa ilang lugar.
Gihaya na sa ilang balay ang patayng lawas sa dalaga samtang gisuta gihapon nila ni Parantar kon wa bay foul play sa insidente. (Dondon Dinoy)