GIMATUOD ni Intelligence Officer 1 Wilson Esparcia sa Philippine Drug Enforcement Agency (PDEA) 12 nga gikan sa siyudad sa Cotabato ang shabu nga gibaligya sa siyudad sa General Santos sa usa ka suspek kinsa nasikop atol sa gilusad nga buy bust operation alas 4 sa hapon niadtong Huwebes.

Matud pa ni Esparcia nga mokabat sa P500 ang kantidad sa shabu nga gipalit sa usa ka nagpakaaron-ingnon nga buyer nga PDEA agent gikan sa suspek.

Post your reaction to the Manila hostage crisis

Sa dihang nasikop na ang suspek, aduna pay nakuha gikan kaniya ang dul-an sa usa ka gramo nga shabu nga nagkantidad og P20,000.00 hangtud sa P25,000.

Matud pa ni Esparcia nga ang pagkasikop sa gikatahapan maoy resulta sa kooperasyon sa mga molupyo ngadto sa mga otoridad.

Ang suspek dugay na nga gipanid-an sa mga otoridad tungod sa ilegal nga kalihukan.

Kasagaran sa mga drug pusher nga nadakpan sa PDEA-12 nagsulti nga nagagikan sa siyudad sa Cotabato ang shabu nga ilang gipamaligya.

Apil sa mga dapit nga gibaligyaan sa druga gikan sa Cotabato mao ang mga siyudad sa Digos, Davao ug Bukidnon.

Gumikan niini nakig-alayon na ang PDEA-12 sa PDEA-Armm alang sa hugtanon nga operasyon sa mga tawong nagpaluyo sa pagpalusot sa gidiling druga sa Cotabato. (Edgardo Fuerzas)