ANG kapulisan nagsusi karon sa anggulo nga may kalambigitan ang trabaho isip ahente sa National Bureau of Investigation (NBI) sa usa sa duha ka tawo nga gipusil patay sa wa mailhing mamumuno niadtong Huwebes.

Ang insidente nahitabo sa alas 8:30 sa buntag didto sa kanto sa mga dalang Jerome ug R. Castillo, Barangay Lapu-lapu, Agdao, siyudad sa Davao.

Post your reaction to the Manila hostage crisis

Mga biktima mao sila Alejandro Garces Darvin (unang nailhan nga Darwin Garces), 48, minyo, nagpuyo sa Medalla Milagrosa, Buhangin ug Samson Dela Torre Laguindam, 53, minyo ug nagpuyo sa R. Castillo, Agdao.

Ang progress report sa kapulisan nagbutyag nga usa ka ahente sa NBI si Laguindam, sigun sa anak niini nga nahinabi ni PO2 Marlon Donquilab, duty investigator sa Sta. Ana Police Station.

Nasayran nga nagsakay ang mga biktima og motorsiklo samtang nagsubay sa Jerome Street apan dihang miabot sila sa kanto sa R. Castillo, misugat kanila ang usa ka tawo dayon gipusil sila sa makadaghan nga higayon gamit ang .45 kaliber nga pistola.

Si Darvin nakaangkon og samad sa iyang likod samtang si Laguindam sa iyang dughan hinungdan nga gideklara silang "dead on arrival" sa Southern Philippines Medical Center (SPMC).

Mga biktima maoy ika-14 ka mga tawo nga gipamusil dinhi sa siyudad sa Davao, base lamang sa namantala sa Superbalita sa bulan sa Agosto 2010.

Niadtong Agosto 2, gipusil patay si Roperto Alag Jr., 49, nagpuyo sa Sta. Barbara Street, La Verna Hills Subdivision, Buhangin. Siya gipusil sulod sa iyang sakyanan didto sa Mamay Road.

Agosto 8, gipusil patay si TSgt. Nestor Salamanca atubangan sa iyang anak samtang nagmaneho sa iyang motorsiklo didto sa Tugbok.

Agosto 10, gipusil sila Enrique Santiago, 38, minyo, salesman ug nagpuyo sa St. Joseph the Worker, Purok Tinago ug si Cristituto Marindoque, 35, minyo, ug garbage collector sa City Environment and Natural Resources (Cenro).

Si Santiago namatay sa maong insidente samtang si Marindoque gitambalan sa Southern Philippines Medical Center (SPMC).

Agosto 12, gipusil sab sila Jomel Parami, 28, ultiawo, tricycle driver ug nagpuyo sa Kilometro 6, Barangay Matina Pangi, ning siyudad ug Melwin Allado, 25, habal-habal drayber ug nagpuyo sa Puan.

Si Parami gipusil patay didto sa Terminal sa Matina Crossing samtang si Allado swerte nga nabuhi dihang gipusil didto sa Puan Public Market.

Ang maong hitabo nasundan niadtong Agosto 15 human gipusil ang usa ka last two coordinator nga si Arturo Cantabaco, 51, minyo ug nagpuyo sa Masea Village, Barangay Duterte, Agdao.

Si Cantabaco gibanatan sa wa mailhing mamumuno sa gawas sabongan sa Buhangin.

Sa Agosto 16, gipusil sab sa alas 10:00 sa buntag si Ronald Molina, alyas Mac-mac, 22, nagpuyo sa Kilometer 7, Barangay Matina Pangi.

Ang insidente nahitabo kilid sa Jollibee Matina Crossing.

Samtang niadtong Agosto 18, gipusil patay sab sila Ranel Bargamento, 33, minyo, empleyado sa Cenro ug Willy Amador, alyas Wisely Amador, 44, panday ug napuyo sa Maharlika Village, Barangay Maa.

Ug ang labing uwahing hitabo niadtong Agosto 19, mao ang pagpusil kang Renato Tan Reyes, 48, minyo ug nagpuyo sa No. 72, Almond Drive, Phase 7, Ecoland. Si Reyes namatay sulod sa tambalan pagkasunod adlaw human siya gipusil didto sa atubangan sa Indonesian School, Ecoland.

Gawas kang Reyes, gipusil sab si Alvin Herbosho, 23, ulitawo ug nagpuyo sa San Jose, Ipil Beach sa iyang paggawas sa balay sa alas 5:00 sa buntag niadtong Agosto 20.

Ang sunod-sunod nga pagpamusil patay maoy hinungdaan nga mitumaw ang katahap nga posibleng binuhatan kini sa mga vigilante grupo, apan ang kapulisan wa mikompirma niini sanglit padayon pa ang ilang imbestigasyon. (AD)