NIKALIT pagkalubog og balik ang nagkatinaw na untang panagsabotsabot tali sa dakbayan ug sa probinsiya sa Sugbo kalabot ning kontrobersiya nga 93-1 lots nga nahimutang sa teritoriyo sa siyudad.
Ang maong luna gipanag-iya sa probinsiya apan gipuy-an sa pipila ka mga botante sa dakbayan.
Sa dihang nagkagrabe na ang panagsungi tali ni Cebu Gov. Gwen Garcia ug kanhi Cebu City mayor ug karon south district Congressman Tomas Osmeña, gusto sa probinsiya nga bawion ang maong luna ug papahawaon ang mga molupyo.
Apan sa dihang nilingkod na ang bag-ong mayor sa Sugbo nga si Mike Rama, nihayag ang panagsabotsabot tali sa dakbayan ug sa probinsiya.
Kini gihangop sa kadaghanan ilabi na sa mga naapektohan.
Abli na unta ang pultahan sa negusasyon, apan sa kalit lang gitiklop og balik ni Gov. Garcia, human si Mayor Rama, ubos sa mando ni Osmeña, ug ang konseho sa Sugbo mi-approved sa resolution nga naghatag og financial assistance nga P500,000 ngadto ni Daanbantayan Mayor Luisa Loot.
Si Loot, ning bag-ohay lang, grabe usab kaayo nga gikasungi ni Gov. Garcia.
Sa laktod nga pagkasulti, gipalit sa dakbayan ang away ni Gov. Garcia ug Loot nga maoy nakapaulbo sa kaspa sa gobernador nga unta wa may labot ang dakbayan sa probinsiya.
Sa gipakita usab ni Mayor Rama, nga daw sa nahadlok ug dali ra kaayong naka-aksyon sa mando ni Osmeña, napamatud-an nga wa gayud diay siyay igong baruganan sa iyang pagka-mayor.
Di niya igbali bisan og makadaot ba sa iyang plano, basta Osmeña okey siya.
Pagkahayay ni Tomas Osmeña, Congressman na, mayor pa.