DEAR Noy Kulas,
Ako si Diday, nagtrabaho sa abroad isip domestic helper. Natural ra diri sa gawas nga dunay mga Pinoy nga magkauyab. Pero kining akoang situation mas komplikado.
Duna koy uyab diri nga Pinoy apan minyo. Maayo ang dagan sa imong relationship kay layo niya iyang pamilya. Nagkasabot mi nga di ko manghilabot sa relasyon sa iyang pamilya, labina sa iyang asawa. Iyang giklaro nako nga love niya iyang family. Di siya gusto nga magubot.
Nakasabot ko kon unsa ang akong papel sa iyang kinabuhi. Wa ko magpaabot og unsa gikan niya basta ang importante iya kong love. Pinangga ko niya.
Nisulod sa esena sa akong kinabuhi ang akong amo nga lalake. Crush na nako daan ang
akong amo bisan niadtong bag-o pa ko sa ilang balay. Nakabantay na ko niya nga magsige og tan-aw pero molingiw siya kon akong tan-awon. Hangtod nga nanguyab siya nako. Ako siyang gisugot kay ganahan na ko niya daan.
Uyab mi pero wa pay nahitabo namo. Lisod nga makalugar kay busy siya unya makalakaw ko kon akong dayoff. Kauban nako ang akong boyfriend nga Pinoy. Kissing ra mi sa akong amo nga stolen moments pa.
Unsa may akong buhaton, Noy? Asa man nila aning duha ang akong pilion? Like kaayo nako ang akong amo ug mas ganahan ko niya kay sa akong Pinoy nga boyfriend. Please tambagi ko.
DIDAY
Day,
Komplikado man na ang imong kinabuhi karon.Wa ka may pilian nianang duha kay pulos na man na sila minyo. Wa ka na may katungod nga manag-iya ana nila. Kon single pa unta na silang duha, naa kay pilian. Unya di man.
Tinuod layo sa pamilya nang Pinoy boyfriend nimo, apan ang iyang pagkaminyo wa intawon mawagtang. Nagpabilin kana bisan asa pa siyang dapita. Unsa may mahitabo nimo kon momabdos ka diha tungod nianang inyong relasyona, manubag siya? Ibutang ta nga manubag, apan diha ra sa bata, di sa imoha tungod kay di mahimo. Tago-tago pa ang support sa bata kay minyo siya. Kaluoy sa bata nga magdako nga ang amahan di full time or di siya angkunon sa hingpit kay bunga siya sa inyong illicit affair.
Ikaduha, unsa may bation sa imong pamilya kon mahibawo sila nga ang imong uyab minyo? Di na sila malipay, hinunoa, maguol. Mauwaw usab sila. Think about it.
Labaw na nianang imong amo nga lalake. Di ka duyanon sa pamilya sa imong amo kon mahibaw-an nga duna kay relasyon tali sa lalake. Maayo lang kon palayason ka. Unsa kaha kon makahuna-huna sila og dautan diha nimo. Daghan na ra bang mga hitabo nga ang mga helper gibinuangan sa ilang amo. Sayon kaayo kang mabinuangan kay naa ka sa ilang poder.
Tarunga ang imong kinabuhi. Buwagi nang duha ug pagbag-o sa imong kinabuhi.
Pagpakigrelasyon og ulitawo nga makadawat kanimo. Ayaw puy-i ang kinabuhi nga gubot pa sa lukot. Wa kay makab-ot nga kalinaw nianang kinabuhia kon magpadayon ka sa pagpuyo nga ingon niana.
NOY KULAS