GIDAYEG nga mas maayo ug mas kompleto og mga kahimanan ang mga sakop sa Special Weapons and Tactics (Swat) team sa Lapu-Lapu City Police (LCPO).

Kagahapon sa buntag, ang mga sakop sa Swat nihimog scenario sa hostage drama sama sa nahitabo sa kaulohan.

Updates on President Benigno Aquino III's presidency

Ang maong kalihukan gitambongan mismo sa mga opisyal sa City Hall pinangulohan ni Mayor Paz Radaza ug kadagkuan sa dagkong mga hotel sa dakbayan sa Lapu-Lapu.

Una, adunay negotiation nga gihimo samtang ang suspek nangayog pagka-on mao nga gihatagan.

Apan sa dihang nangayo na ang hostage taker og helicopter ug dilna mahatag sa mga negotiator, ang kapulisan nideklarar nga pagkyas ang sabosabot ug diha na niabot ang mga sakop sa Swat.

Human sa maong hitabo, ang representante sa Police Regional Office (PRO-7) nga si Senior Supt. Josephus Angan, chief of staff   sa PRO-7, niingon nga sigun sa iyang nakita mas kompleto ang Swat team sa Lapu-Lapu city ug mga kahimanan sama sa night vision goggle nga wa sa mga sakop sa Swat sa Manila.

Apan gitataw ni Angan nga ang kanunay nga pagbansay-bansay maoy labing mahinungdanon sa tanan aron di sila malimot kon unsay ilang buhaton kon anaa na sila sa actual nga sitwasyon.

Samtang susihon ang ilang mga kahimanan sa matag karon ug unya aron di mokagar panahon nga ilang na gyong gamiton.  

Si Radaza, sa iyang bahin, nisaad nga dugang pa unyang modernong mga kahimanan ang iyang ihatag sa Swat ingon man hinabang financial alang sa ilang mga training nga pagabuhaton sa matag karon ug unya.

Matod sa mayor nga ang kagamhanan sa dakbayan sento porsiyentong nipaluyo sa kapulisan tungod kay ang kahusay ug kalinaw maoy usa sa iyang gitinguha tungod kay ang Lapu-Lapu usa man sa mga tourist destination.

Lakip sa nakadayeg mao ang mga general manager sa mga five star hotel sa dakbayan sa Lapu-Lapu nga ningtambong sa kalihukan.

Walo ka turistang taga Hong Kong ang namatay sa hostage taking sa Manila.