ANG kakuwang og pansayan sa usa sa mga tunghaan sa elementarya sa lungsod sa Badian maoy nakapahimong popular sa usa ka 9 anyos nga batang babaye nga irekomendar aron pasidunggan sa iyang kamatinud-anon nga niuli sa P50,000 nga iyang nakit-an sa kalibunan sa pagtubag sa sugo sa lawas.

Updates on President Benigno Aquino III's presidency

Ang kuwarta tipik sa kinawat nga salapi sa usa ka sikyu sa dakbayan sa Lapu-Lapu nga taga lungsod sa Badian, Sugbo.

Girekomendar sa kadagkuan sa kapulisan sa lalawigan sa Sugbo ang paghatag og pasidungog kang Kathlene Taypin, tinun-an sa Malhiao Elementary School sa Brgy.Malhiao, lungsod sa Badian, Sugbo.

Si Cebu Provincial Police Director Sr. Supt. Erson Digal nagkanayon nga iyang irekomendar ngadto kang Gobernador Gwendolyn Garcia nga hatagan og pasidungog ang mao nga tinun-an.

Si Digal mapasalamaton kaayo kang Taypin nga kinasingkasing nga niuli sa kwarta ug wa gyud niini tagoi dihang iyang nakit-an sa kalibunan.

Siya niingon nga talagsaon ra kaayo ang taras sa mao nga bata nga wa masilaw sa kwarta kay kon lain pa ang nakakita, posibleng di na gyud mabalik ang salapi tungod sa kadako niini.

Siya nikompirmar nga ang kwarta kabahin sa nadala sa mga kawatan nga ninglungkab sa usa ka spa sa dakbayan sa Lapulapu sa miaging adlaw.

Sumala pa niya nga nihimo og follow-up operation ang kapulisan sa Lapu-lapu sa lungsod sa Badian aron pagdakop unta kang Heracleo “Ricky” Palagteosa, sikyu, kinsa nagpuyo sa mao nga lugar.

Ang suspek nakaeskapo sa ginukdanay mga alas 9 sa buntag niadtong Huwebes.

Si PO2 Ivan Rey Juarez, sa Badian, Police Station nga nahinabi sa Sun.Star Superbalita nagkanayon nga ang bata padulong unta nga motubag sa sugo sa lawas sa usa ka suok nga dapit duol sa tunghaan.

Nakurat siya dihang iyang nakit-an ang kwarta nga iyang gihipos ug gidala sa ilang classroom ug gipahibawo ang ilang class adviser nga si Geraldine Nepomoceno.

Ilang giihap ang kwarta nga gisaksihan sa caretaker sa tunghaan nga si Aurella Cansico, ingon man mga barangay official sa nahisgutang lugar dayon gi-report ngadto sa kapulisan.

Wa giputos ang kwarta hinungdan nga nakit-an sa bata.

Si Palagteosa pabilin pang gawasnon.(Guam P. Logroño-correspondent)