TEMPORARYONG gawasnon sa pagkapriso si kulomnista ug komentarista Leo Lastimosa human nakapiyansa sa korte sa iyang giatubang nga kasong libelo nga gipasaka ni Gob. Gwen Garcia.

Nipiyansa si Lastimosa sa kantidad nga P10, 000 ngadto kang Regional Trial Court (RTC) Judge Raphael Yrastorza Sr. kagahapon sa hapon dihang nigawas ang warrant of arrest alang kaniya.

Updates on President Benigno Aquino III's presidency

Siya gipasakaan og kaso ni Garcia tungod sa iyang gisuwat nga sa lindog nga “Doling Kawatan”.

Wa na huwata sa kolumnista nga sikupon siya sa mga awtoridad, boluntaryo siyang nitahan sa Fuente Police Station mga alas tres kagahapon sa hapon.

Gikuyogan si Lastimosa ni Fuente Police Station Chief Michael Bastes aron i-turn over sa sala ni Yrastorza unya nipiyansa gilayon siya.

Si Celso Espinosa, abogado ni Lastimosa, nipasabot nga bulontaryo nga nitahan ang iyang kliyente kay di sila buot nga mahasol pa ang mga awtoridad sa pagpangita ni Lastimosa.

Kining kaso nga giatubang sa kolumnista napasaka tungod sa napatik sa mantalaang The Freeman niadtong Hunyo 29, 2007 nga giulohag “Doling Kawatan” nga nipadayag si Garcia nga siya maoy gipasabot ni Lastimosa.

Apan, gihimakak sa kolumnista nga ang iyang gipasabot ang gobernador.

Sa samang kalambuan, wa mahimuot si Yrastorza sa mga sakop sa media dihang nitumaw kagahapon ang taho sa pagpagawas sa warrant of arrest batok kang Lastimosa.

Gikataho nga gipagawas sa huwes ang warrant niadto untang Huwebes apan wa nipirma hinungdan nga kagahapon sa buntag kini giisyu.

Apan, gibakwi ni Yrastorza sa pagka-buntag human nasayod nga nigawas na ang taho sa mantalaan busa sa hapon na kini gipagawas.

Unang gikasab-an sa huwes ang iyang mga staff tungod sa paghatag og impormasyon sa media kabahin sa warrant. (JECT)