USA ka negusiyanteng Tsinoy ang gidagit sa mga armadong grupo alas 5:35 sa hapon, Sabado, didto sa siyudad sa Cotabato.
Nailhan sa kapulisan ang biktima nga si Conchita Atienza Tan, 73, asawa sa Filipino-Chinese businessman nga si Lucio Tan tag-iya sa LCT Hardware.
Gibutyag ni Cotabato City Police Director Willie Dangane nga nahitabo ang pagpangdagit samtang sakay ang biktima sa usa ka kotse gikan sa ilang tindahan pauli sa ilang pinuy-anan.
Sumala pa nga kalit lamang miabot ang pito ka mga armadong kalalakin-an duol sa Tan Compound sa Purok Salvacion, Barangay Rosary Heights 2.
Nakahimo pa sa pagsukol ang drayber nga si Richard Emberga ug security escort nga si Alvin Doruelo diin nakigpinusilay pa sila ngadto sa mga suspetsado.
Apan napatay gihapon ang duha sa mga armado.
Pinugos nga gidala sa mga kidnaper ang negusiyante ug gipasakay sa naghulat nga duha ka get-away car paingon sa wala matino nga direksyon.
Dali nga milusad og follow-up operation ang kapulisan sa Cotabato uban ang Task Group Tugis diin ilang narekober ang duha ka sakyanan nga gigamit sa mga suspetsado sa Doton Street, Barangay Rosary Heights 3.
Ang duha ka sakyanan mao ang Tamaraw FX, may plakang ULS 805 ug Mitsubishi Lancer, kolor maroon, nga walay plaka.
Matud sa mga sibilyan sa dapit gisakay sa mga kidnaper ang negusiyante sa bangkang de motor subay sa Rio Grande de Mindanao paingon sa probinsiya sa Maguindanao.
Hangtud karon wala pay gipaabot nga ransom demand ang mga kidnaper ngadto sa pamilya sa biktima samtang nagpadayon ang gilusad nga rescue operation sa hiniusang puwersa sa militar ug kapulisan. (Edgardo Fuerzas)