MIABOT na sa 37 mil ka mga tawo ang namakwet tungod sa nagka-init nga away sa duha ka armadong pamilya sa probinsiya sa Cotabato.

Kahinumduman, nga gisulong sa mokabat 50 ka miyembro sa Moro Islamic Liberation Front (MILF), pinangulohan ni Kumander Daud Macalaay, ang outpost sa mga sakop sa Civilian Volunter Organization (CVO) sa Sitio Patalin, Barangay Kisupaan, President Roxas sa maong probinsiya.

Post your reaction to the Manila hostage crisis

Ang hitabo miresulta sa kamatayon sa usa ka tawo ug miangol sab og laing usa gikan sa grupo ni Magalona Ampatuan sa Barangay Chairman sa Kisupaan.

Gibutyag ni 602nd Brigade Chief Brigadier General Alejandro Estomo nga hangtud karon nagdumili ang mga sibilyan sa pagbalik sa ilang mga pinuy-anan sa kahadlok nga anaa lamang sa palibot ang mga rebelde.

Dili sab makalihok ang puwersa sa militar ug kapulisan gumikan ilang gitagaan og panahon ang mga lokal nga opisyal nga maduso ang negusasyon sa magka-away nga grupo.

Si Kumander Macalaay ug Kapitan Magalona dunay dumot tungod sa away politika ug yuta nga ilang gi-ugmad sa maong dapit.

Si MILF Military Spokesman Von Alhaq nagkanayon nga walay kalabutan ang ilang grupo sa maong kagubot apan personal nga away tali nila Macalaay ug Kapitan Ampatuan.

Mismong si President Roxas Mayor Rosita Racines ug Cotabato Governor Emmylou Talinio Mendoza maoy nangunay sa negusasyon aron resolbahon ang dumot sa magka-away nga pamilya. (Edgardo Fuerzas)