USA ka lalaki kritikal ang kahimtang karon sulod sa ospital human gitigbas samtang nanihapon sa balay sa iyang higala didto sa Purok 2, Barangay Linoan, lungsod sa Montevista Comval Province, Huwebes sa gabii.

Nailhan ang biktima nga si Romeo Parilla, hamtung ang panuigon, molupyo sa susamang dapit.

Post your reaction to the Manila hostage crisis

Samtang ang suspek nailhan nga si Reynaldo Jauod, alyas Toto.

Sa report gikan Comval Province Police Provincial Office, nasayran nga pasado alas 7:00 sa gabii samtang nanihapon ang biktima uban ang iyang mga higala nga sila Felomina Garcia ug si Sabino Garcia didto sa lugar dihang kalit nga mibutho ang suspek nga si Jauod.

Sa way paglangan gipangtigbas sa suspek ang biktima ug ang iyang kauban gamit ang usa ka sundang.

Maayo na lamang nga ang duha ka Garcia nakadagan, wa sila naigo, apan ang biktimang si Parilla maoy gidemalas human matadtad ang lawas.

Daling gidala sa Davao Regional Hospital sa siyudad sa Tagum ang biktima diin pabiling kritikal ang kahimtang niini.

Ang suspek dali sab nga miikyas padulong sa wa matino nga lugar human sa pagpanigbas.

Kapulisan sa lungsod sa Montevista mihimo na og dugang imbestigasyon sa hitabo.

Samtang ang suspek gipangita na karon sa mga otoridad. (Marvin Pineda)