USA ka ulitawo gipusil sa wa mailhing mga suspetsadong nakamotor didto sa Purok 9, Barangay Poblacion, lungsod sa Maco, Comval Province, Biyernes sa kaadlawon.
Nailhan ang biktima nga mao si Jenven Kin Paquera, 19, molupyo sa susamang dapit.
Sa report nga nakutlo gikan sa Comval Province Police Provincial Office nasayran nga nahitabo ang pagpamusil pasado alas 2:40 sa kaadlawon samtang nagbaktas ang biktima didto sa maong lugar.
Sa kalit lamang miabot ang duha ka wa mailhing mga lalaking nakamotor ug sa way paglangan gipusil ang biktima gamit ang kalibre .45 nga pistola.
Nakahiagum og samad pinusilan sa nagkadaiyang parte sa kalawasan ang biktima nga dali sab nga gidala sa ospital.
Samtang mga suspek daling misibat padulong sa wa matino nga lugar sakay sa usa ka Honda XRM nga motor.
Mga miresponding sakop sa Maco Municipal Police Station nakahipus og lima ka mga balines sa kalibre .45 nga pistola didto sa nahitabuan nga maoy gituohang gigamit sa mga suspek.
Kapulisan sa lungsod sa Maco mihimo na og dugang imbestigasyon sa pagpamusil.
Blangko pa sab ang mga otoridad sa pag-ila sa mga suspek ug motibo sa pagpusil. (Marvin Pineda)