USA ka 50 anyos nga pamuno sa Lupon Tagapamayapa sa barangay ang gitigbas didto sa lungsod sa Malita, Davao del Sur.

Ang Malita police nag-ila sa biktima nga mao si Danilo Rosendo alyas Monoy, hingkod ang pangedaron ug lumolupyo sa Sitio Babasal, Barangay Pangian sa maong lugar.

Post your reaction to the Manila hostage crisis

Sumala pa nga nahitabo ang init nga komprontasyon sa biktima ug suspek nga nailhang si Dog Panayas.

Banda alas 11 sa buntag, Biyernes, dihang nahitabo ang pagpanigbas didto sa lugar. Kalit matud pang nikuha og sundang ang suspek ug dayon gitigbas si Rosendo tumong sa iyang ulo.

Gilayong gisapupo ang biktima aron dalhon sa duol nga tambalanan apan gumikan sa talandugong kahimtang nidesisyon ang mga mananambal nga ilahos na lang didto sa dakbayan sa Digos.

Ang suspek nga si Panayas, hamtong ang pangedaron, usa ka laborer didto sa Sitio Agdao, Barangay Tubalan, padayon pang gipangita sa kapulisan aron manubag sa salaod nga nahimo.

Giandam na sab sa Malita police ang pagduso og tukmang kaso batok sa suspek. (Dondon Dinoy)