NAHINAYKAN sa amahan ang iyang anak sa pagdunggab gumikan sa kalagot niini dihang gimumo kini sa abuhan sa ilang panimalay sa Purok-6, Barangay Misom, Baliangao, Misamis Occidental.
Ang amahan nga si Dominador Gumahad, 67, ang gisikop ug gibalhog karon sa prisuhan human nahinaykan niini og dunggab iyang anak nga si Agner, 24.
Saysay niini nga miuli iyang anak nga hubog ug kalit nga nanumbag kaniya ug wala pa makuntento gimumo siya sa ilang abuhan.
Dugang sa amahan nga dili lang kini unang higayon nga gihimo sa iyang anak kaniya panahon kini mahubog.
Maoy rason nikuha ang amahan og 22 ka pulgada sa sundang ug gidunggab ang anak nga anaa karon talandugon ang kahimtang sa Calamba District Hospital.
Ang amahan nga gibalhog karon sa prisuhan ang gitakdang mag-atubang og kasong frustrated homicide.