Vallena: Unsaon pagpili og unang bike(1)

Roger Vallena

Pedal

NIADTONG Disyembre nagplano kong mopalit og laptop aron sayon ra nako pag-check ang mga e-mail bisan duna koy mga lakaw. Labina kon naa sa biyahe. Apan nausab ang akong huna-huna human sa taas taas nga pagtimbangtimbang. Naka-decide ko sa pagpalit og bike kay sayon ra nako ang pagduaw sa lubong sa akoang anak ug maka-exrcise ko, malingaw pa to fight depression.

Human sa pipila ka mga higayon nga pagpangutana ug tubag sa among mga kauban nga suheto og bikes ug pagbisita sa mga local bikeshop (LBS) nga dunay low-end bikes, mipalit gyud ko. Apan didto ko nakapalit sa shop nga wa nako suroya sa sayo pa kay kalit man sab nga nausab ang akong huna-huna. Sa Wellson Enterprises sa dan Plaridel sa downtown Cebu city ko nakapalit sa akong unang mountainbike (MTB) sa kantidad nga P8,000. Apan di ni tindahan og low-end bikes kay ang ilang gipamaligya branded frames and parts. Although naa sab silay barato alang niadtong nagdaginot sa budget sama nako.

Nagtuo kong okay na lang ang akong biseklita nga napalit. Niadtong wa makahibawo, kining kantidara ubos ra kaayo kon maengganyo ka nang magbiseklita kada adlaw. Mga duha pa lang gani ka buwan nakong gamit sa akong biseklita, gusto na kong mag-upgrade. Maayo gani kay ang frame sa akong biseklita mosakar sa gikinahanglang maayong parts.

Pila may estorya, naghinayhinay kog palit og parts sa akong bike ubos sa guidance sa akoang higala nga si Bambam. Kay dihang nagkuyog mi sa Aison Bikeshop nga naa sa may dan AS Fortuna, atbang sa Rolling Hills, kay nagpaayo siya sa iyang biseklita, nauwaw ko kay pwerteng nindota sa mga biseklitang gidala didto. Didto sab ko nakahibawo nga kon ganahan na ka mag-bike, labina kon magsuotsuot o mosaka ka na og bukid, mas maayo kon ang imong biseklita maayo og parts, di maglayatlayat ang kadena diha sa sprocket sa imong pagpangambyada ug lig-on aron makaaguwanta sa subida ug bahada sa libaungon nga karsada. Mas maayo sab kon gaan.

Unsa may akong sayop sa pagdali-dali nakog palit og bike? Wa ko makahuwat kon duna na koy igong natigom. Kay mao ra gihapon, nag-upgrade ko, naghinayhinay kog palit og better parts. Didto ko maka-realize nga mas maayo gyud diay nga di magdali-dali. Ang arang-arang nga budget sa pagpalit og MTB gikan gyud diay sa P15,000 ngadto sa P20,000.

Di sab maayong magpataka og palit kay ang MTB frames duna sab diay sukod depende sa imong gitas-on. Base sa akoang kasinatian ug pagpangutana sab nako sa Cebuano champion sa MTB races nga si Niño Surban, sa akong height nga 5’4”, ang haom nakong frames size is size 15 inches diay. Kini imong makita diha sa sticker nga gipapilit sa frame or aron maseguro, pangutana sa mga staff sa LBS nga imong palitan sa sukod. Or kon duna kay kailang suheto og MTB, pagpatambag o magpakuyog. Ayaw pagpatuga nga kahibawo ka. (sumpayan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph