Bartolome Man. Panilagao

Lacaron, San Fernando, Cebu

SAMTANG nagkadusingot og tinayhop si Utyang sa gilak-ang niyang bibingka sayo ning buntaga, maoy nasawod sa iyang dunggan ang singgaak ni Tonyo nga daw mitadlas sa tibuok balangay sa Tinubdan.

“Budboddd mo Nanggg…Manoyyy…mga indayyy…!” singgit ni Tonyo.

Updates on President Benigno Aquino III's presidency

Nagpanindak sa iyang tiil si Utyang sa kalagot. Unsaon pa pagkahalin sa iyang gilutong bibingka nga naunhan na man siya ni Tonyo? Sukad nabiyudo si Tonyo kang anhing Tasing nagkalingaw na kinig luto og budbod, kay mao man kini ang naandan nilang kapangwartahan sa buhi pa si Tasing. Si Utyang, sa iyang bahin, ilong tuwapos na ug dalagang guwang. Nalingaw usab siya sa pagpangluto og bibingka nga iyang ibaligya sa tiyanggihan sa ilang lungsod.

Di tuyuon mogisod sa hunahuna ni Utyang ang kaagi nilang duha ni Tonyo nga ‘diehard’ niyang maghahalad kanhi.

“Bisan kon ikaw na lang ang mahabilin nga ulitawo ibabaw sa kalibutan, Tonyo, di gyud mahitabo nga mopitik ang akong kasingkasing aron ikaw higugmaon!” pintok ang mga pulong ni Utyang.

“Ngano man, Utyang, nga gahi pa man sa bahi ang imong kasingkasing aron imo kong higugmaon?” hapit na lang moluhod si Tonyo niadtong higayuna sa atubangan ni Utyang.

“Tungod kay di ko ‘type’ ang imong hitsura!” ni Tasing.

Sa pagpanglabay sa katuigan mao na lay nahibaw-an ni Utyang nga naminyo si Tonyo kang Tasing. Wa batia og kaguol si Utyang kay wa man gyud siyay gugma kang Tonyo.

Nahinumdom si Utyang sa panudya sa iyang naanhing nga inahan.

“Tan-awa unsay nahitabo kanimo, Utyang? Nagpabilin kang dalagang guwang ug nanimaho na lang upos sa tabako! Kinsa pay magpakabuang og pangulitawo nimo nga ang imong hitsura… kuyos pa man sa luy-a?”

“Budboddddd mooo, Nangggg! Manoyyyyy! Mga Indyyyyy….!”

Nabati na sab ni Utyang ang katil-is sa tingog ni Tonyo nga maoy nakaputol sa iyang hamubong paghanduraw.

“Hoy, Tonyo! Dali ra god!” tawag ni Utyang.

“Motilaw ka, Utyang, sa linuto kong budbod nga hilabihang inita pa?” ni Tonyo nga misulod sa kusina.

Mipunit si Utyang og usa ka buok budbod aron tilawan. Mikulima iyang nawong; wa siya lamii.

“Gibaliw ka, Tonyo, nga bugnaw pa man kini sa simod sa itoy!” bagulbol ni Utyang.

Takulahaw mibundak ang makusog nga ulan mikuray si Tonyo sa katugnaw. Unya mao na lamay iyang nabatyagan nga hugot kaayo siya nga gigakos ni Utyang.

“Sulayi kuno, Tonyo, paghikap kining laing haon sa akong bibingka, di ba manginit ang imong budbod kon maalisngawan sa kainit niini,” nagkanguhal ang tingog ni Utyang nga mibutad kang Tonyo aron manghigda sila sa salog.

Unya mibanos ang nagbuy-od nga kahilom tali kanilang Utyang ug Tonyo. Dayon mipuli ang hinangos ug inagunto sa duha ka binuhat nga tigluto og budbod ug bibingka. Nagkasinabot na ang pinitik sa ilang mga kasingkasing. (KATAPUSAN)