GIKATAWA na lang sa pipila nako ka higala ang kauwaw adtong palpak nga assault sa 200 ka sakop sa Swat sa Manila.
Pipila nako ka text mate nagkanayon nga mas maayo pa ang ilang team sa “Airsoft.” Gilabwan kini sa ni-post sa Facebook wall sa akong anak kay mas maayo pa kuno ang iyang barkada nga mahilig sa “Counterstrike.”
“So We Aren’t Trained,” nagkanayon si Konsehal Jack Jakosalem dihang nag-press conference ang Y101 alang sa ilang Bootleg Live nga event sa Sandtrap.
“So We Are Talawan” ang meaning na sa Swat, matod sab sa usa ka editor, dihang among gihisgutan ang kahadlok sa mga Swat sa Manila nga modasdas dayon kay kuno dunay armalite ang bugtong hostage-taker sulod sa usa ka tourist bus atubangan sa dakong hawanan sa Quirino Grandstand sa Luneta.
Ambot lang adto nila. Nagdala og pisi para mabunlot sa pultahan apan nipis sab kaayo nga daw lambo nga daling naputol sa ilang pagbira. Dunay atong nakita nga niitsa og teargas sa nabuak nga bintana apan sa kabutalo, wa masulod sa bus.
Dihang nibundak ang ulan, nagkabuang sab dayon sila sa pagpasilong. Mahadlok mabasa ang mga kagwang.
Matod pa sa usa nga nakaagi og training niining pag-assault og bus, lisod-lisod gyud ang ingon niini nga scenario. Ambot lang, tingale kon ang bus nga gigamit sa maong training di mahimong gub-on. Lisod gyud pagsulod.
MGA GERMAN
Di na lang kita maghisgot og kanang naa sa mga sine. Dunay live nga video sa Youtube (i-search ang “bus hostage rescue”) nga nagpakita sa usa ka tinuod nga assault sa German Swat forces sa usa ka bus sa miaging 2009. Pipila lang ka segundos sukad sa unang buto, nasulod dayon nila ang bus ug nasikop ang hostage-taker nga nakalitan.
Dunay nikomentaryo sa video nga lahi kini nga sitwasyon kay kuno adlaw ug way kurtina ang bus. Banga sab ang hostage taker.
Apan makita nato nga wa sab gyud mahadlok ang mga sakop sa Swat didto sa Germany ug dali kaayo silang nakabuak dayon sa mga bintana ug nakakatkat.
Atong mabantayan sab nga way mga usisero sa duol. Ang mga nagkuha sa video didto ra sa layo apan gialerungan og mga awto ang bus ug didto nagpahipi ang daghang mga sakop sa assault team.
“Mao nay assault,” akong gisultian akong kaugalingon.
MEDIA
Naglibog ko nganong gibasol sa kadagkuan sa kapulisan ang media tungod sa live coverage niini ug ang pag-interview kang Senior Insp. Rolando Mendoza, ang hostake taker.
Matod pa, ang nasuk-an ni Mendoza mao ang pagkakita niya sa live television coverage sa iyang igsuon nga gidakop. Nakakita siya sa position sa assault team. Ug wa makalusot ang tawag sa negotiator kay nagtubag kini sa tawag sa usa ka broadcaster.
Apan pipila ka oras sa wa pa ang assault, nganong wa may nanghangyo sa mga kadagkuan sa mga television outlet nga di lang i-live ang coverage? Total, makahulat man ang publiko nga makahibawo sa kamatuoran. Mas mahinungdanon nga di makahibawo unta si Mendoza sa mga nahitabo sa gawas.
Wa man masakripisyo ang kamatuoran kon maulahi ang pagsibya sa mga nahitabo. Mahibaw-an sab gihapon nga palpak ang kapulisan kon bisan pa man sa pagtuman sa media, usa ka oras gihapon ang ilang assault nga urong-sulong.
Ang nakapait lang gyud kay ang tibuok nasud ang naulawan ug ang atong turismo nahimo karong collateral damage.