Nalzaro: Wari-wari sa kuwarta

ISAULOG karon sa dakbayan sa Sugbo ang ika-74 ka tuig nga Charter Day. Hinungdan nga fiesta official karong adlawa. Walay klase ug walay trabaho sa dakbayan sa Sugbo lamang ha. Ubay-ubay nga mga kalihukan ang nakalinya sa usa ka semana nga selebrasyon.

Ang kagamhanan migahin ug P5.4 milyones alang ning maong kasaulugan. Pastilan no, pagkadako baya nianang kuwartaha nga gastuhon lang sa walay hinungdan.

Nganong nakaingon ko nga walay hinungdan? Gumikan kay dili unta angayan nga mogasto nianang maong kantidad ang City Hall. Puwede man kita nga magsaulog sa Charter Day sa yano apan mabulukon nga selebrasyon. Angayan pa ba god ta nga mohatag og dakong insentibo o cash award ngadto sa mga outstanding department heads? Ila god nang trabaho. Ang napili nakadawat ug P50 mil. Plaque og lamano, okey ra na oy.

BURASKA

Angayan pa ba gyod nga anha magpaka-on sa luho nga hotel nga mahal kaayo ang pagkaon?

Nganong dili man lang diha ipahigayon sa City Hall o ba kaha sa Cebu City Sports Complex? Minus pa ang gasto gumikan kay dili na angayan mag-abang. Angayan untang huna-huna ni Mayor Mike Rama nga kuwarta sa mga magbubuhis ang kuwarta nga gigamit niana.

Ang P5.4 million is P5.4 million pesos. Bisan unsang linguwahe ang atong gamiton niana. Dako na kaayo kanang maong kantidad. Daghan na unta silang mapalit nga tambal niana alang sa Cebu City Medical Center (CCMC) ug daghan na untang kinabuhi nga masalbar. O ba kaha gigamit nang kuwartaha sa pag-ayum-ayom sa atong mga libaong nga mga kalsada. Ila unta nga huna-hunaon nga kon mogamit sila og kuwarta kanang makabenipisyo ang kinabag-an. Klaro na lang gyod nga pagwari-wari sa kuwarta ang ilang gihimo pagtubag lang sa ilang mga kapritso. Buraska ra kaayo sila.

GUBAON

Kon unsa ka guba ang kalsada dinhi sa dakbayan sa Sugbo ug Mandaue mas grabe pa didto sa dakbayan sa Lapu-Lapu. Sus, kanang mga dalan sa Maribago ug Basak duol anang Imperial Palace, morag lunangan sa kabaw. Ambot unsay gihimo ni Mayor Paz Radaza ana. Tourist destination ang Lapu-Lapu, apan mao nay hulagway sa ilang kadalanan.

Ang Mandaue mao pod. Ang mga ginikanan sa mga tinun-an sa Sacred Heart Ateneo de Cebu, nangreklamo gumikan sa kagubaon sa dalan diha sa Pilit, Cabangkalan. Ambot unsa poy gihimo ni Mayor Jonas Cortes diha. Wa gyuy ayo. Maayo pamakungon ang mga ulo aning Mayor Rama, Cortes ug Radaza. Gikalimtan ang ilang mga saad sa eleksiyon. Pamahuway mo uy. (bobby@sunstar.com.ph)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph