ARON hingpit na nga matapos ang panagsungi sa mga utlanan, ang mga sakop sa konseho sa dakbayan sa Talisay nagtinguha nga subayon ang mga barangay boundary monuments (BBM) sa tanang 22 ka barangay.
Atol sa session niadtong Martes ang mga sakop sa konseho niaprobar sa motion nga gisang-at ni Association of Barangay Councils President Osmundo J. Manreal Jr., nga maoy chairman sa committee on Barangay Affairs nga magtukod og special committee nga maoy mohusay sa mga “boundary disputes”.
Lakip sa dunay init nga kasungian mao ang mga Barangay sa Bulacao ug Candulawan.
Mga opisyal sa Bulacao nangangkon nga ang luna nga gitukoran sa Bulacao Elementary School ilaha.
Apan giingong gitukod ang tunghaan sa territorial jurisdiction sa silingang barangay ang Candulawan.
Tungod sa panagbangi sa mga utlanan, dunay mga kalibog sa pagkolikta sa mga bulohisan ug sa pagpatuman sa batakang serbisyo ngadto sa mga lumolupyo.
Ang pagsusi sa mga mohon sa mga utlanan maoy gituohan nga dako og matabang aron masulbad ang panagsungi.
Apan nasuta nga daghang mga mohon ang nangawagtang na dihang gihimo survey sa mga utlanan. Lakip sa mga barangay nga dunay panagsungi mao ang mga Brgy. Lawaan I, II ,III ug Biasong nga pulos way BBM.
Ang special committee nga tukoron maoy motuon sa mga problema nga motumaw ug mosulbad sa mga boundary conflict.