GRUPO sa mga manindahay sa Carbon Market sa dakbayan sa Sugbo ningdangop kang Mayor Michael Rama human nahulga ang ilang pagpaninda gumikan sa bag-ong palisiya sa City Hall.

Si Maria Pino-Buanghug, chairperson sa Cebu City United Vendors Association CCUVA, nipadala og suwat hangyo alang sa mayor may labot sa ilang hugtanong pagsupak nga sila papirmahon sa usa ka kasabutan.

Updates on President Benigno Aquino III's presidency

Nasayran nga ang market administrator sa siyudad Raquel Arce nipahibawo sa tanang manindahay sa Carbon Market Complex nga mosul-ob na sa City Hall-issued identification (ID) cards atol sa ilang pagpaninda.

Ang tanang miyembro gikinahanglan nga moduso sa mga gipangayo nga requirements nga naglakip sa voter’s certificate, nagpamatuod nga mga botante sa siyudad ug bayranan nga P75 alang sa ID lamination ug laing P100 sa notarial fee sa Affidavit of Undertaking nga gikinahanglan pirmahan sa matag manindahay.

Gitataw ni Buanghug nga wa silay supak sa paggamit sa ID atol sa ilang pagpaninda, apan wa sila makauyon sa natala sa Affidavit of Undertaking hinungdan nga nagdumili sila sa pagpirma.

“…at anytime the Cebu City Government at their own discretion requiring me to vacate the area, I am currently occupying. I would voluntarily remove all items for sale without delay resort to further court order/s,” tipik sa natala sa maong affidavit.

Matod ni Buanghug, susama ra nga gikuhaan sila og katungod sa ilang pagpakabuhi ug way legal basis kalabot sa sidewalk vending nga maoy nag-una nilang panginabuhian.

Nabalaka ang mga manindahay sanglit karong Septiyembre 1 ipatuman na ang ID system sa Carbon market, “…those who have no ID’s will be demolished.”

Ang mga manindahay nangayo sa dinalian nga panabang ni Rama sa dili pa ikapatuman ang maong deadline. (FVQ)