PATAY ang usa ka Muslim human gipusil sa duha ka wala mailhing tawo nga nagsakay og motorsiklo sa Sitio Tilegahon, Barangay Bangkal, dakbayan sa Lapu-Lapu, pasado alang 10:00 niadtong Biyernes sa gabii.
Ang namatay giila sa kapulisan nga si Orak Daligdig, 31, minyo, way trabaho, ug taga Sitio Iba, Barangay Basak sa samang dakbayan.
Wa makuha ang plate number sa motorsiklo nga gigamit sa duha ka mga mamumuno.
Sumala ni PO3 Dioscoro Arong sa Homicide Section, ang biktima naglakaw pauli sa ilang balay sa dihang kalit lang niabot ang duha ka mga lalake ug nangutana kon asa ang Sitio Puol apan kalit lang gipusil sa nag-angkas sud sa tulo ka mga higayon.
Ang biktima naigo sa iyang tiyan nga niresulta sa pagkamatay niini dihadiha samtang ang mga gikatahapan daling nisibat.
Ang tagtungod sa namatay nagdumili sa awhag sa kapulisan nga ipailawom sa autopsy ang lawas sa biktima basi sa ilang tradisyon sa Muslim.
Sa pagkakaron, ang Homicide Section padayon pa sa ilang pakisusi kon unsay motibo sa pagpatay ug mailhan ang mga namusil. (DRT/JFT)