SUSPEK sa pag-ambush sa magpapatigayon nga si Debbie Yu ug sa namatay nga drayber nga si Sonny Boy Mahilum gituohang gihiloan pinaagi sa pagpasulod sa tulo ka botelyang juice.

Sa wa pa kini mahitabo, ang pangulo sa Mandaue City Police Office (MCPO) daan nang nakadawat og report nga adunay plano nga patyon ang mastermind nga si Marites Velasco ug ang mga suspek nga gustong mahimong state witness.

Ang duha sa lima ka mga suspek duha ka mga adlaw nga wa makabarog human nila mainom ang maong juice niadtong Miyerkules.

Updates on President Benigno Aquino III's presidency

Kahinumdoman, ang kapulisan sa Mandaue city nisikop kanila ni Aldrin Montecalvo, kinsa maoy giingong gunman; Orbel Inihao, drayber sa motorsiklo; Johnjoy Palo-Palo, Rodilito Buenavista, nga pulos mga lookout ug si Velasco, kinsa giingong mastermind sa kremin.

Si Senior Insp. Jose Rusylvi Abueva, warden sa Mandaue City Jail nga nahinabi sa Sun.Star Superbalita, nikompirmar sa hitabo.

Matod niya nga niadtong Miyerkules sa buntag nibisita ang inahan ni Johnjoy nga si Nerrisa Palo-Palo dala ang tulo ka mga botelya sa juice alang kang Johnjoy ug sa asawa niini nga si Velasco.

Apan gamay pa gani ang nainom sa duha, kalit lang silang nangaluya ug nagsakit ang ilang tiyan hangtod nga wa na makabarog.

Hinuon kagahapon gikatahong gikatahong nakabarog na ang duha apan luya pa gihapon ang ilang lawas sud sa bilanggoan.

Ang magtiayon wa dad-a sa ospital kay naatiman ra man sila sa mga medical staff sa prisohan.

Di sab expired ang ilang gipang-inom. Ang usa ka botelya mo-expire sa Mayo 2011 samtang ang laing usa sa Hulyo sa samang tuig.

Nabantayan sab nga lain na kini og kolor ug ingon sa dunay linugdang.

Ang tulo ka mga botelya sa juice nga daghan pag sulod daling gihipos sa mga jail guard alang na sa pagpahiling Bureau of Food and Drugs Administration (BFAD) sa tuyo nga matino kon aduna bay hilo nga gibutang o ba kaha daotan lang ang juice.

Apan si Insp. Anacleto Durasan Jr., deputy jail warden, niingon nga sigun sa ilang nasayran abli nang daan ang tulo ka mga botelya juice sa dihang niabot sa mga gikatahapan.

Si Senior Supt. Noel Gillamac, pangulo sa MCPO, wa mosalikway sa posebilidad nga resulta na kini sa ilang nadawat nga report nga dunay planong patyon ang mga suspek.

Gani ang hepe sa homicide section nga si Insp. Ramil Morpos iya gilayong gisugo sa pag-adto sa city jail human niya madawat ang report aron pahimangnuan ang mga suspek.

Apan ang lima ka mga suspek nagdumili na sa pag-atubang kanila ug mao na lay ilang nasayran nga ang duha nahilo na.

Gumikan niini, si Gillamac niawhag sa kadagkuan sa city jail nga monitoron na ang bisan unsang pagkaon nga ipadala sa mga suspek ilabi na ang inahan ni Palo-Palo.