MISIBAT gikan sa ospital human natambalan ang usa ka biktima sa pagpangluba kagahapon mga alas 3:10 sa kadlawon sa Divisoria ning siyudad sa Cagayan de Oro.

Giila ang biktima nga mao si Adonis Vega, 31, ulitawo, taga Macabalan ning siyudad.

Post your reaction to the Manila hostage crisis

Gibutyag sa personahe sa Northern Mindanao Medical Center (NMMC) nga gihatod sa tambalanan si Vega human giluba sa usa ka balay kalingawan sa Divisoria nga bahin.

Nakaangkon kini og samad nilubaan sa kilid nga bahin hawak niini dihang giluba sa wala mailing mga suspetsado gamit ang buak sa botelya.

Dali kining gidala sa NMMC apan dihang nahuman og tambal wala kini mibayad sa obligasyon niini sa tambalanan og misibat.

Samtang laing biktima sa pagpangluba sa Divisoria gihapon ning siyudad nga mao si Ranilo Nano, 15, taga Tablon ning siyudad kinsa nakangkon og siyam ka mga samad nilubaan sa lain-laing parte sa lawas human giluba niadtong Sabado mga alas 10:30 sa gabii sulod sa usa ka balay kalingawan sa dapit.

Gidudahang selos ang motibo sa pagpangluba dihang daw usa ka babaye ang giawayan niini ug sa miluba niini.

Kritikal ang kahimtang ni Nano nga padayon pang giobserbahan sa mga doktor.

Ang kaso giimbestigahan na usab sa kapolisan sa Police Station 1 (PS1) sa Divisoria. (SVB)