NILANDING sa balay tambalanan ang usa ka asawa human nakuyapan dihang gikulata sa kaugalingon nga kapuyo niadtong Sabado mga alas 10:30 sa gabii sulod sa merkado sa Agora, Lapasan ning siyudad sa Cagayan de Oro.

Nilanding sa Northern Mindanao Medical Center (NMMC) si Mishel Lactao, 19, taga Lapasan ning siyudad human nakuyapan dihang gikulata sa kapuyong giilang si Jerson.

Post your reaction to the Manila hostage crisis

Gibutyag sa higala sa biktima nga nahinabi sa Sun.Star Superbalita nga igo lamang naglingaw-lingaw si Mishel sa usa ka balay kalingawan ug nag videoke niadtong tungora.

Dihang kalit nga miapas si Jerson sa videokihan, samtang nagkanta ang biktima kalit kining gibira sa kapuyo ug giayo og sukmag human gidudahang nagselos.

Walay naka-aparta niini dihang nakurat usab ang mga tawo panghitabo. Grabe ang pagpanukmag nga gihimo niini hinungdan nga nakuyapan sa kasakit ang biktima.

Gani nakurat pag-ayo ang kapuyo sa iyang nahimo ug mismo kining nidala pagdali sa biktima sa NMMC aron matambalan.

Ang insidente natala sa Police Station 3 (PS3) sa Agora ug padayon pang giimbestigahan sa Womens and Children Protection Desk (WCPD).

Sa pagsulat ning balita nagpabilin pa nga giobserbahan sa mga doctor ang biktima ug giingon sa higala niini nga daw nagbasol ang kapuyo niini sa nahimo. (SVB)