DUHA ka kaso sa pagpanulis ang natigayon sa mismong adlaw sa kapistahan ning siyudad sa Cagayan de Oro.

Unang biktima mao si Jenny Fer C. Ratso, 18, dalaga, taga Hilltop, Carmen ning siyudad.

Post your reaction to the Manila hostage crisis

Gitulis ang biktima samtang nagbaklay sa dalan Capt. Vicente Roa St., ning siyudad mga alas 4:00 sa hapon adlawng Sabado.

Mideklarar og tulis human gitionan og kutsilyo si Ratso ug nakuha ang cellphone sa biktima. Dali nga nagpatabang sa Police Station 2 (PS2) sa Cogon si Ratso hinungdan nga gihimo ang manhunt operation human nakita sa biktima ang hitsura sa suspek sa photo gallery sa kapolisan.

Dihang gilusad ang man-hunt operation nasikop ang sakop sa BM-29 (Batang Mindanao) nga giilang si Belmin P. Agon, taga Adela, Camaman-an ning siyudad.

Ang kapolisan sa PS2 nga nahinabi sa Sun.Star Superbalita niingon nga nakuha gikan sa posisyon niini ang kutsilyo nga adunay 8 pulagadas ang katas-on nga maoy gition ngadto sa biktima.

Giangkon usab sa suspetsado ang iyang salaod apan wala gihapon nahibalik ang cellphone sa biktima human gihatag kini sa iyang higala. Nagtingkagol sa Maharlika Detention Cell ang biktima ning panahona.

Laing biktima sa pagpanulis ang usa ka trisikad driver nga mao si Rosito D. Balmoria, 26, ulitawo, taga Upper 20th Nazareth ning siyudad.

Gisaysay sa biktima sa kapolisan sa PS2 sa Cogon nga samtang namasayro niadtong Sabado mga alas 6:30 sa hapon usa ka lalaki ang nagsakay kaniya gikan sa merkado sa Cogon ug nagpahatod paingon sa dalan Yacapin St., ning siyudad.

Apan sa wala pa niabot sa Yacapin St., diin nagpahatod ang suspek kalit lang kining nanion og kutsilyo ug mideklarar og tulis sa driver. Gipangayo niini ang iyang cellphone nga mobalor og P1,200. human dali mikanaog ug misibat.

Walay nahimo si Balmoria nga igo na lang nagpatabang sa kapolisan. (Stephanie V. Berganio)