UPAT ang patay samtang laing usa ang angol human nahug sa pangpang ang usa ka trak sa alas 4:00 sa kaadlawon, Sabado, sa probinsiya sa Saranggani.
Giila sa kapulisan ang namatay sa aksidente nga sila si Silverio Alcasin, drayber nga si Panfilo Abasinia, operator sa backhoe nga naila sa ngalang Jay, ug ang miuban sa biyahe ang mag-uuma nga si Alberto Intiro.
Samdan mao si Sarlo Alcasin, 17 anyos, ulitawo ug anak ni Silverio nga nag-inusarang naluwas sa aksidente.
Sumala pa nga ang ten-wheeler truck gikan pa sa Malita, Davao del Sur kung asa karga ang backhoe nga gamiton unta sa road widening sa Glan.
Gibutyag ni PNP-12 Regional Director Felicisimo Khu nga kalit lang nawad-an og kontrol ang drayber sa sakyanan ug nabangga sa railings sa tulay duol na sa Barangay Poblacion, Glan, dayon nahulog kini sa pangpang.
Dali nga miresponde ang mga pulis sa dapit dihang gitawgan sila sa mga sibilyan.
Mga biktima gidala sa Glan District Hospital.
Ang 17-anyos nga si Alcasin nagsaysay nga nakasinggit pa ang iyang amahan nga nawad-an og preno ang ilang gisakyan.
Mihimo na sab karon og imbestigasyon ang kapulisan sa Glan labot sa hitabo. (Edgardo Fuerzas)