USA ka sakop sa Citizen Armed Forces Geographical Unit ang gipusil patay sa alas 7:00 sa gabii, niadtong Sabado, didto sa probinsiya sa Sultan Kudarat.

Nailhan sa kapulisan ang biktima nga si Gaudencio Tumazor, 44, minyo, ug molupyo sa Barangay Tran, Lebak.

Post your reaction to the Manila hostage crisis

Sa nahagpat nga taho gikan sa Tactical Command Post sa 6th Infantry (Kampilan) Division Philippine Army nasayran nga samtang naglakaw ang biktima gikan sa ilang detachment pauli na sa ilang pinuy-anan nag-atang na diay ang mamumuno, sa way paglangan gipusil ang biktima gamit ang M16 armalite rifles.

Namatay gilayon si Tumazor nga natusak-tusak sa mga bala ang nagkadaiyang parte sa iyang lawas samtang mga mamumuno dali nga misibat paingon sa wala matino nga dapit.

Si Andrena, asawa sa biktima, nagsulti nga sa wala pa gipatay ang iyang bana may nakabangi kini nga grupo gumikan sa bikil sa yuta nga ilang gi-ugmad.

Gibutyag ni Sultan Kudarat Police Provincial Director SSupt. Teng Tucao Mamalinta nga may mga tawo na sila nga gi-ukoy nga posibling dunay kalabutan sa pagpatay sa biktima.

Sumala pa nga nakig-alayon na sila sa kasundaluhan sa pag-ukoy sa mga suspetsado. (Edgardo Fuerzas)