BOLUNTARYONG mitahan ang usa ka lalaki kinsa suspek sa kasong pagpanigbas ngadto sa otoridad didto sa lungsod sa Malita, Davao del Sur.

Banda alas 9:50 sa buntag, Agosto 28, ang suspek nga si Ermund Dulay, alyas Tata, hingkod, niangkon sa kapulisan nga siya maoy nanigbas sa biktimang mao si Fidel Monsing.

Post your reaction to the Manila hostage crisis

Si Monsing, lumolupyo sa Sitio Migsuling, Barangay Buhangin sa lugar, namatay diha dayon human nahiagom og mga samad tinigbasan sa nagkadaiyang parte sa kalawasan.

Gitigbas ang biktima niadtong banda alas 3:42 ang takna sa hapon, Agosto 25. Unang nisibat ang suspek padong sa wa matinong direksyon.

Gumikan kay nakonsensya sa sala nga iyang nahimo, nakahukom ang suspek nga motahan na lamang inay nga tibuok kinabuhi siyang magtago sa balaod.

Gilayong gikustudiya sa Malita police ang suspek human nga nasang-at ang kaso ngadto sa piskalya.

Wa pay giluwatang pahayag ang pamilya sa biktima kalabot sa pagtahan sa suspek.

Gidason sab sa kapulisan nga kuyog sa suspek ang iyang amahang si Nestor Dulay atol sa iyang pagtahan. (Dondon Dinoy)