NISANGKO sa pagkapangos ug pagkabun-og sa kalawasan ang babayeng nitabok sa kalsada human kalit naligsan og motorsiklo, Sabado.

Banda alas 4:40 ang takna sa hapon, sa dihang ang biktima nga mao si Bebileta Lanticse, 40, minyo ug lumolupyo sa Bagong Silang, Almendras District, lungsod sa Padada, gidasmagan sa kolor blue nga Honda TMX 155, nagbaton sa plakang LD-2814.

Post your reaction to the Manila hostage crisis

Ang motor gimaneho ni Dennis Libreta, 39, minyo ug usa ka kawani sa pribadong patigayon didto sa Barangay Poblacion, lungsod sa Malita, Davao del Sur.

Samtang nagdagan ang motorsiklo gikan sa south padong north direction sa lugar, atubangan sa Morales Rice and Corn Mill, nitabok ang babaye ug naligsan.

Sa kakusog sa dagan sa motorsiklo, ang drayber sa motor nga nilagpot sa nalimbuwad nga motor, gidali pagdala sa Sunga Hospital ug ang biktima, nga nahiagom sab og mga pangos ug bun-og sa kalawasan, gidapatan og tambal sa Digos Doctors Hospital, didto sa siyudad sa Digos.

Si Police Officer 2 Danny Moalong, nagbutyag nga grabe ang pagkaguba sa motor nga gipailawom na sa ilang kustudiya samtang ang mga biktima padayon pang giatiman sud sa bay tambalanan. (Dondon Dinoy)