DI TINUOD ang pasangil nga di gusto og kalambuan ang mga tribal leaders sa kabukiran sa distrito sa Paquibato, sigun ni Datu Ruben Labawan sakop sa Supreme Tribal Council for Peace and Development (STCPD) dinhi sa siyudad sa Davao.

"Ang di gusto og development kadto lang mga leftist nga tribal leaders. Ang among grupo gusto kaayo nga dunay mga development projects sa among lugar," ni Labawan dihang gihinabi kagahapon sa Superbalita.

Post your reaction to the Manila hostage crisis

Si Labawan nagsulti nga gipahid lamang kanila ang maong pasangil aron motuo ang lokal nga kagamhanan nga sila ang di mosugot nga dunay proyektong pangkalambuan sa Paquibato District.

"Gusto man gud nila nga dili ma-develop ang usa ka lugar aron magpadayon gihapon ang recruitment activity sa NPA. Hangtud nga naa pa ang kalisud sa bukid, duna silay magamit nga hinungdan aron sayon nilang ma-recruit ang katawhan sa bukid," pung ni Labawan.

Si Labawan namahayag nga ang ilang pundok naningkamot nga makig-abin sa gobyerno aron makakuha sila og mga proyekto aron mapahimuslan sa ilang mga kaigsuonang lumad.

"Ang among gusto nga dunay kalambuan sa among lugar aron mawala na ang mga rebelde nga nakasamok sa malinawong namong pagpuyo sa bukid," pahayag ni Labawan.

Si Labawan makaduha na nga gitinguhang patyon sa mga rebelde tungod sa iyang kampanya nga paalsahon ang mga lumad batok sa mga NPA.

Unang hitabo mao ang paglabay og granada sa iyang balay pipila na ka tuig ang milabay, ug ang ikaduha mao ang pagbanhig kaniya didto sa Sitio Maragaa, Barangay Colosas, Paquibato niadtong Agosto 6, 2010.

Si Labawan nakaangkon lamang og tapsing nga samad sa iyang walang tudlo ug milagron naluwas kauban ang iyang asawa dihang girapido sila sa 30 ka mga rebelde.

Sa maong pagpamanhig, tulo ang namatay samtang tulo sab ang nasamdan sa mga kauban ni Labawan kinsa padulong motambong sa usa ka convention sa mga tribal leaders didto sa 1003rd Infantry Brigade. (AD)