USA ka gidudahang kawatan ang napusilan sa sakop sa Task Force Davao dihang misud sa Bureau of Customs Designated Area of Examination sa alas 3:20 sa kaadlawon kagahapon didto sa Kilometro 10, Barangay Sasa, siyudad sa Davao.

Midangat sa Southern Philippines Medical Center (SPMC) mao si Raymart (bansagon gitago kay menor), 17, nagpuyo sa Kabayan Village, Barangay Tibungco, ning siyudad.

Post your reaction to the Manila hostage crisis

Si SPO2 Rico Digamon sa Sasa Police Station nagbutyag sa iyang spot report nga samtang nag-roving si SCAA Aurelio Reyes sa "designated area of examination" iyang nadungog ang banha sa mga iro mao nga iya kining gisusi.

Matud ni Digamon nga dihang miabot si Reyes sa dapit diin mipaghot ang mga iro, iyang nasiplatan ang duha ka mga tawo nga midagan paingon sa "cyclone" nga koral.

Ang duha, suma ni Reyes, misaka sa "cyclone" nga koral dayon miambak sa pikas tampi mao nga iyang gipasalbahan apan mipadayon gihapon sila sa pagdagan.

Si Reyes nakahukom nga iya nalang pusilon sa tiil aron iyang masakpan ug maimbestigahan ang mga suspetsado.

Si Raymart, human naigo sa tiil, gibiyaan sa iyang kauban tungod sa kahadlok nga madakpan sa security guard nga sakop sa TF Davao.

Ang suspetsado daling gidala didto sa SPMC aron patambalan samtang gihimo sa kapulisan ang imbestigasyon.

Nasayran nga ikaduhang higayon na kadto nga misud sila sa maong compound. Sa unang higayon giingon nga ilang giguba ang salamin nga bintana sa maong gambalay apan napakyas sila sanglit nasanta ni Reyes.

Sa pagsuwat ning balita, gipaabot pa ang progress report sa kapulisan bahin sa maong hitabo. (AD)