NANGHAROS ang mga Pinoy batok sa ilang tagsatagsa ka langyawng kaatbang sa miaging gabii sa “Philippines vs. the World” boxing promotion sa Waterfront Hotel sa Lahug, Cebu.
Sa main event, si Rey “Boom-Boom” Bautista (29-2, 22KOs) nimugna og 4th TKO nga kadaugan batok kang Mexican Alejandro Barrera (20-4, 13KOs) apan sila gyud si Milan “Milenyo” Melindo ug Jimrex “The Executioner” Jaca ang niposte sa labing impresibong kadaugan.
Nahunong ang away nila ni Bautista ug Barrera sa ika-1:14 minutos sa 4th round dihang nagisian og dako sa ilawom nga bahin sa iyang tuo nga kilay an ig-agaw ni Mexican legend Marco Antonio Barrera.
Ang referee midesisyon nga kumo maoy hinungdan sa pagkagisi ug dili headbutt hinungdan nga nakuha ni Bautista ang TKO nga kadaugan.
Apan hugtanon kining gikuwestiyon sa kampo ni Barrera.
“It was a clear headbutt. It should be a disqualification or a no contest,” matod pa sa trainer ni Barrera nga si Victor Correa pinaagi sa usa ka interpreter.
Adunay katahap si Correa nga gituyo pag-undang ang away tungod niadtong higayuna, nagtuo siyang paingon nang tumbahon ni Barrera si Bautista.
“Barrera was about to knockout Bautista that’s why they stop the fight. We want a rematch,” dugang ni Correa.
Apan gitino ni ring physician Jose Unabia nga dili na gyud puwedeng paawayon pa si Barrera kay lawom kaayo ang gisi.
“Dako kaayo ang gisi. Mga three centimeters seguro, dili na madala,” pasabot ni Unabia.
Sa interbyu sa ABS-CBN human sa away, si Bautista nangayo og pasaylo sa iyang mga sumosunod sa resulta sa away.
“Patawarin ninyo ako na hindi ko siya na-knockout. Intensyon ko talaga na i-knockout siya pero hindi nangyari,” matod pa ni Bautista.
Si Melindo (22-0, 6KOs) nibuhi og tayming kaayo nga 1-2 nga kumbinasyon nga gituldokan og left upper cut nga miigo sa apapangig aron tumbahon si Korean Jin Man Jeon (13-4-1, 3KOs) sa ika-43 segundos sa 2nd round alang sa knockout nga kadaugan.
Samtang si Jaca (31-6-3, 16KOs) nagkinahanglan lang 2:22 minutos sa 1st round aron palukapahon si Mexican Pepino Cuevas Jr. (14-6, 12KOs) pinaagi sa iyang left straight alang sab sa knockout nga kadaugan.
Ang kanhi world champion nga si Florantes Condes 24-5-1, 20KOs) midaog sab batok kang Indonesian Sofyan Efendi (10-9-2, 8KOs) pinaagi sa unanimous decision.