BISAN dali rang buhaton ang sayop, dili sayon ang pag-angkon nga sagad kita masipyat. Lisod kaayo ang pagdawat sa kamatuoran: Wala unta’y lapok pilit sa atong lapa-lapa kon lutaw pa laktod sa panganod ang atong agianan.
Apan, sayod ta nga gipakatawo ta nga gikaluhaan og kahigayonan sa pagkadagma, pagkadakdak, pagkalukapa, pagkaligid. Kay hastang pagkahagip-ot, tungasonon pod, ug dili gyod intawon tul-id ang dalan sa mga santos.
Mao bitaw nga wala mahingpit ang kadaogan ni Venus Raj, ang kandidata sa Pilipinas sa niaging tigi sa tibuok kalibotan alang sa labing matahom ug listo motubag sa wala-damha nga pangutana.
Daghan ang gatuo nga siya unta ang angay purong-purongan isip Miss Universe 2o10, ug dili lang ilhon isip 4th runner-up, kon iya pang gipanghimakak nga wala siya’y nabuhat nga “major major” nga kasaypanan sukad sa iyang pagkatawo. Kay bisan pa’g matinud-anon ang katam-is sa iyang pahiyom ug madanihon kaayo iyang lawas labi na’g morampa, pwera buyag, makataas gyod sa kilay sa kadaghanan ang iyang pamatuod nga wala pa siya natakilpo tungod sa iyang kalapasan.
Apan bisan pa’g dayag kaayo ang iyang pagkasulondon pakapin sa iyang kaanyag, simang kaayo ug layo ra niya ang mga gamhanan sa atong nasod nga kanunay lang maumod sa ilang pagkadanghag ug pagkabulay-og.
Bitaw, kon wala’y sagol sa hinanggaw ang iyang gibutyag, sukwahi kaayo niya bisan ang mga gihangdan ug gisaligan nato sa ilang pagkagamhanan.
Kay bisan pa’g gapakita og timailhan nga hinay-hinay ug hapit na mobangon ang nasod gikan sa pagkasukamod sa kapit-os, gaungot gihapon sa kagamhanan ang mga badlongon.
Bisan pa’g sinaw ang saad sa masaaron ug matinud-anon nga katilingbanong pangalagad ubos sa bag-ong pamunoan ni P-Noy, dayag nga magkinahanglan ta’g milagro aron mahalikay ta sa hinanaling pagkadunot sa pamolitika sa atong nasod.
Dayag nga gagimaw pod kining salawayon nga kamatuoran sa bisan asang hut-ong sa gahom, pananglitan sa mga tigpatuman sa balaod, kahapsay ug kalinaw.
Sayod ta nga kurat ug tamparos kaayo sa atong nasudnong kadungganan ang dugoon nga gidangatan sa walo ka mga turista didto sa Kaulohan bag-ohay lang. Wa’y lalis nga usa ka “major major mistake” ang ilang pagdumala ug pagpakgang sa hostage crisis.
Apan kon kining tanan mao’y timailhan kon unsa’y nakasayop sa nasudnong kahimtang, usik ug wa’y bili tuod ang nasinati natong kapakyas kon igo ra tang modanguyngoy ug magbakho nga pinakurog ang bag-ang. Usik tuod ang kahigayon sa kausaban kon wala ta’y makat-onan nga “major major” bawos ug tubos sa tanan natong gianugonan.
(geemyko@gmail.com)