ANG dyRC nga naila nga “The Voice of Cebu,” usa sa mga pioneer sa broadcast industry dinhi sa Sugbo.
Gani, sa libro ni Dr. Resil B. Mojares nga “The Man Who Would Be President” morag kang Rudyard Kipling nga “The Man Who Would Be King”) bahin sa kinabuhi ni Sergio Osmeña Jr., amahan sa kanhi mayor sa dakbayan sa Sugbo ug karon kongresista sa south district Tomas Osmeña, makita sa ibabaw nga bahin sa pahina 132 ang hulagway ni Serging nga namahayag sa dyRC ug dyBU.
Sa laktod, ang dyRC nahimong kabahin sa kasaysayan sa Sugbo.
***
Nagsugod ako sa pangradyo uban ni Ronnie Catadman didto sa dyMF nga kaniadto giila nga Radyo Vigilantes (way labot sa giingong mga vigilantes nga nakapatay og mokabat sa 200 ka mga gikatahapang kriminal ug kanhi konbiktado) ug gidumala sa bantugang magsisibya nga si Manny Rabacal.
Apan nabalhin dayon ako sa dyRC nga kaniadto didto pa sa duol sa Cebu Doctor’s Hospital sa Osmeña Boulevard.
Kadaghanan sa mga bantugang magsisibya sa Sugbo kaniadto niagi sa dyRC sama nila ni anhing Inday Nita Cortes Daluz, Ben Zubiri nga naila nga si Iyo Karpo ug ang tinamod ug tinahod nga S. D. Tecson ingon man si Kuya Lou Sabandal.
***
Didto sa dyRC akong gikahibalag ang mga beteranong magsisibya sama nila ni anhing Ramonito del Rosario, Danny Relatado ug Art Maloy (Arturo Maloloy-on), ang among manager nga si Roy Ladiona ug news director nga si Brady Lucero ug Nene Parawan.
Sa dihang nagkuwang og mga news writers ang DYRC, akoy nataymingan og sugo ni Brady Lucero unya di pa ko makamaong mo-type.
Ang sugo ni Brady mao nga dugdoka lang ang letra kay moagi ra na. Kana maoy hinungdan nga tinagsa ra ang akong pag-type hangtod karon. Gitawag kana sa Iningles nga “hunt and peck system,” morag manok nga mokakha una motuka, sukwahi sa “touch typing.”
Gitawag ni nakog “Biblical system” tungod sa giingon nga “seek and you shall find” kay mangita pa man ka sa letra una modukdok sa typewriter.
***
Paglabay sa panahon, ni-sign off ang sibyaanan DYRC tungod sa mga katarungang ekonomikanhon. Abi nako kon permanente na ang pagkapawong niini sa kahanginan.
Apan gipahibawo ako ni magsisibya Nino Padilla nga ang iyang grupo mopaabanhaw sa sa DYRC karong Septyembre 21, atol sa ika 70 nga anibersaryo sa pagtukod sa maong sibyaanan.
Adto na kini magsibya sa ikatulong andana sa Maria Luisa Building sa Fuente Osmeña sa dakbayan sa Sugbo.