LAING kinabuhi ang nakalas tungod sa gang war.

Usa ka 17-anyos gikulata ug gipusil-patay sa sakop sa mga Crips gang sa M.J. Cuenco Ave., Barangay Carreta, dakbayan sa Sugbo kagahapon sa hapon.

Ang biktima mao si Dave Gegremosa, 17, usa ka car wash boy sa Salinas Drive ug taga Sitio Zapatera, Barangay Luz ning siyudad.

Updates on President Benigno Aquino III's presidency

Sumala sa kapulisan, ang responsableng gang nga nagpatay sa menor de edad gilangkoban sa napulo ka mga batan-ong.

Si SPO2 Elmer Tanjay sa Mabolo police station nga nahinabi sa Sun.Star Superbalita nagkanayon nga ang biktima kauban sa iyang duha ka silingan nga sila si Christian Mangubat, 16, ug Efren Baflor, 16, pulos sakop sa Bloods gang, ang nailang kaatbang sa Crips.

Giingong ang biktima ug mga kauban nitambong sa usa ka bunyag sa Barangay Lorega ug sa ilang pagpauli nianang alas 3:30 sa hapon, namukong kini sa pagsakay pinaagi sa pagkapyot sa luyo sa PUJ nga 03L nga rota paingon sa Mabolo.

Samtang nagkapyot ang tulo ka mga batan-on, ang PUJ hinay kining nagdagan ug kalit lang nga si Efren Baflor gibunlot sa gibanabang napulo ka mga batan-on nga sakop sa Crips ug gitabangan sa pagkulata.

Dihang nagsigeg kulata ang mga batan-on ngadto kang Efren, nabati gilayon ang usa ka sipang buto sa wa pa matinong armas ug naigo si Gegremosa diha sa iyang bukton nga nilapos sa iyahang lawas.

Human sa pagpamusil ang 10 ka mga batan-ong suspek daling nakasibat paingon na sa sud nga bahin sa Lorega.

Hinuon, si SPO2 Tanjay, nagkanayon nga ang kauban sa biktima nakaila sa gunman nga batan-on nga ginganlan lang og “Marjou” nga gipangita na sa awtoridad.

Apan dugang sa taho sa kapulisan, posibling napagan lang ang biktima sa gang war sanglit ang iyang mga higala lang sa biktima maoy klaro nga mga sakop sa Bloods gang nga kontra sa Crips.