Balay sa doktor gibombahan
PADAYON nga giimbestigahan ang motibo sa pagpamomba sa usa ka panimalay sa doctor niadtong Domingo mga alas 3:00 sa kadlawon sa sa Bugo ning siyudad sa Cagayan de Oro.
Gilabay og granada sa wala mailang mga suspetsado sakay og van ang panimalay ni Dr. Espileto Caramba hinungdan sa pagbusikad sa usa sa duha ka granada nga gilabay.
Sa pamahayag ni Caramba sa usa ka sibyaan sa radyo gibutyag niini nga nagpasalamat siya nga tingkatulog pa niadtong tungora hinungdan nga dihang mibusikad pipila lamang sa mga semento ang naguba ingon man walay naangol sa insidente.
Dihang girespondehan sa kapolisan sa Police Station 6 (PS6) sa Puerto ang insidente nakuha gikan sa crime scene ang duha ka mga M26 hand grenade.
Gibutyag usab sa doctor nga sa wala pa nahitabo ang insidente kanunay na siya nakadawat og hulga ug blanko usab kini kinsa naghimo sa ingon.
Ang kaso ning panahona gitugyan na sa City Intelligence and Detective Unit (Cidu) alang sa dugang imbestigasyon labina ang motibo ug pag-ila sa mga suspetsado. (SVB)