PATAY ang manag-uyab human napasok ilawom sa 10-wheeler truck ang gisakyan nga motorsiklo niadtong Domingo mga alas 9:00 sa gabii sa Barangay Jampason, lungsod sa Jasaan, Misamis Oriental.

Si Police Officer 2 Erick Saburnido sa Jasaan Police Station niila sa mga biktima nga mao sila si Randy Cabuya-Babasol, 19, ulitawo ug Leh Mae Cabirto-Mercado, 19, taga Kimaya, susamang lungsod.

Post your reaction to the Manila hostage crisis

Sa interbyu nga gihimo sa Sun.Star Superbalita ngadto kang Saburnido kinsa usa sa mirespondeng polis sa dapit nasayran nga nagsaulog sa iyang natawhan si Babasol ug paingon na nga manguli sa puloy-anan sakay sa gimanehong motorsiklo nga nagdala og tempraryong plaka NREB-3227.

Usa ka 10-wheeler truck nga kargado og falcata nga gimaneho ni Ruel Simafranca, taga Agusan del Sur ang nawad-an og suga hinungdan nga mihunong ug nipadaplin sa kalsada aron ayuhon.

Gani ang mag-uyab unang namatikdan sa driver nga ni-overtake kanila sa wala pa niabot sa lugar diin nawad-an og suga ang trak hinungdan mihunong.

Dihang mihunong ang trak ug mikanaog ang helper niini aron magbutang og early warning device kalit lang nga nadungog ang kusog nga buto ug pagsusi sa helper ug driver sa 10-wheeler anaa na sa ilawom sa 10-wheeler ang mag-uyab ug grabeng dugo uban sa motorsiklo nga maayong pagkaguba.

Matud ni Saburnido nga posibleng wala gyod namatikdan ni Babasol ang ten wheeler nga anaa sa dalan tungod sa kangitngit gawas pa nga wala deretso nabutang ang warning sign.

Nakahig ang mga ulo sa biktima sa ilawom sa ten wheeler hinungdan nga dead on the spot. Giresponde sa kapolisan ang insidente ug wala na madala sa balay tambalanan ang mga biktima.

Detinado ang driver ning panahona sa prisuhan sa Jasaan Police Station apan niingon nga dili siya mabasol sa insidente labina aksidente ang hitabo. (Stephanie V. Berganio)