GIBUHIAN na sa mga armadong grupo ang negusiyante nga gidagit alas 4:00 sa hapon niadtong Dominggo didto sa probinsiya sa Maguindanao.
Si Maguindanao Police Provincial Director Marcelo Pintac nagsulti nga gumikan sa negusasyon sa mga lokal nga opisyal, mga Muslim elders ug mga opisyal sa Moro Islamic Liberation Front (MILF) gibuhian sa mga suspetsado si Wilson Albores sa usa ka hilit nga dapit didto sa utlanan sa Sultan Mastura ug siyudad sa Cotabato.
Giklaro sab ni Pintac nga dili kidnap for ransom ang motibo sa pagdagit sa biktima apan personal nga atraso sa usa ka wala gibutyag nga grupo.
Apan mikatag ang balita nga mibayad og "board and lodging" ang pamilya ngadto sa mga midagit sa negusiyante.
Kahinumduman nga niadtong milabay nga adlaw nagtindog lang ang biktima duol sa iyang tindahan sa Barangay Tambo, Sultan Mastura sa diha nga kalit mibutho ang lima ka mga armadong lalaki ug pinugos nga gisakay si Albores sa usa ka L300 van paingon sa wala matino nga direksyon.
Dali nga milusad og negusasyon si Maguindanao Governor Esmael Toto Mangudadatu uban si Sultan Mastura Mayor Mando Mastura ug Sultan Kudarat Mayor Datu Tucao Mastura, apil na ang mga Muslim elders ug mga opisyal sa MILF hinungdan nga gibuhian ang biktima.
Giklaro ni Pintac nga bisan gibuhian sa mga kidnaper si Albores magpadayon ang ilang imbestigasyon aron sikupon ang mga suspek. (Edgardo Fuerzas)