USA ka biyuda gitigbas sa iyang igsuon banda alas 7:30 sa buntag kagahapon didto sa lungsod sa Sarangani, Davao del Sur.

Ang biktima giila nga si Maria Apon Vda. De Perarta, 42, ug lumolupyo sa Barangay Tinina, lungsod sa Sarangani, Davao del Sur.

Post your reaction to the Manila hostage crisis

Subay sa taho nga nahipos sa Sun.Star Superbalita, usa ka samad tinigbasan ang nahiaguman sa agtang sa biktima hinungdan nga gidali pagtabang ug gidala sa ospital sa siyudad sa General Santos.

Gitudlo sa kapulisan ang suspek nga mao si Ruel Apon, 32, mag-uuma ug taga didto ra usab sa maong lugar.

Nisulay pa sa pagsibat ang suspek apan tungod sa daling pagresponde sa kapulisan, nadakpan ra kini.

Giingong sundang ang gigamit sa suspek sa pagtigbas sa iyang igsuon. Gipahayag sa mga otoridad nga personal nga bangi ang nagtukmod sa suspek aron tigbason ang iyang maguwang nga babaye.

Samtang gidapatan og tambal sa mga doktor ang biktima, gihikay sab sa kapulisan ang kasong "frustrated homicide" batok sa suspek. Gipadlak na ang suspek sa selda sa kapulisan atol sa pagsuwat ning balita. (Dondon Dinoy)