USA ka lalaki kritikal ang kahimtang karon sulod sa ospital human gitabangan og luba sa wa mailhing mga suspek sulod sa usa ka balay kalingawan didto sa Barangay San Francisco, siyudad sa Panabo, Sabado sa gabii.

Nailhan ang biktima nga mao si Wilfredo Banhao, 24, ug molupyo sa Arguilles Subdivision, Barangay San Franciso, siyudad sa Panabo.

Post your reaction to the Manila hostage crisis

Sumala sa report gikan sa Davao del Norte Police Provincial Office nga pasado alas 10:00 sa gabii samtang didto sulod sa may Ultra Bowl nga nahimutang sa may national highway sa maong lugar ang biktima, gitabangan siya og luba sa wa mailhing mga suspek gamit ang kutsilyo.

Ang biktima nahiagum og samad dinunggaban sa kalawasan mao nga daling gidala sa Rivera Hospital sa siyudad sa Panabo.

Apan tungod sa daghang mga samad sa biktima gibalhin siya sa Tagum Doctor's Hospital sa dakbayan sa Tagum.

Mga suspek dayong misibat padulong sa wa matino nga lugar human sa pagpanunggab.

Ang igsuon sa biktima nga si Winston Banhao maoy nagpatabang ngadto sa buhatan sa kapulisan.

Mga sakop sa 2nd Platoon sa Davao del Norte Police Provincial Public Safety gilayong miresponde ug ilang nasikop ang duha sa mga suspek nga nailhan nga mao si alyas Dodong Pantanusas ug Al dela Cruz.

Mga suspek gitanggong dayong sulod sa selda samtang gihikay na ang kasong ipahamtang batok kanila.

Kapulisan mihimo na og dugang imbestigasyon sa maong hitabo. (Marvin Pineda)