USA ka babaye gipusil patay sa iyang guwardiya sulod mismo sa iyang pinuy-anan didto sa Sityo Kimura, Barangay San Miguel, Samal District, Island Garden City of Samal, Sabado sa hapon.

Nailhan ang biktima nga mao si Margie dela Cruz, 23, ug molupyo sa Barangay San Miguel.

Post your reaction to the Manila hostage crisis

Samtang ang suspek mao ang iyang guwardiya nga si Renante Florentino, 30, sekyu nga nagtrabaho sa RG Security and Protective Agency.

Sa report gikan sa Davao del Norte Police Provincial Office nasayran nga nahitabo ang pagpamusil pasado alas 4:00 sa hapon sa sulod sa usa ka bahay kubo didto sa ilang balay ang biktima. Kalit lang matud pa niya nga gipusil sa suspek gamit ang iyang 12-gauge shot gun nga pusil.

Naigo ang biktima sa iyang ulo hinungdan nga nahagba siya ug nakutluan sa iyang kinabuhi diha-diha dayon.

Human sa pagpamusil ang suspek misibat sab dayon aron di maabtan sa pulis.

Apan pagka-gabii misurender ang suspek ngadto sa mga otoridad human nakonsensiya sa iyang gihimo.

Ang suspek dayong gitanggong sulod sa selda samtang gihikay na ang kaso batok kaniya.

Matud sa suspek nga nahimo niya ang maong pagpamusil human siya gikasab-an sa biktima kinsa mihulgang tanggalon siya sa trabaho.

Sumala sa suspek nga sa gihimo sa iyang agalon, nawala siya sa iyang maayong panghuna-huna mao nga iyang napatay ang biktima.

Ang biktima nga si dela Cruz, asawa sa usa ka Swiss National nga si Diether Desch nga dunay negusyo sa maong lugar.

Dugay na sab nga panahon nga nagserbisyo ang suspek ngadto sa biktima isip guwardiya.

Kapulisan sa siyudad sa Samal mihimo na og dugang imbestigasyon sa maong hitabo. (Marvin Pineda)