MAKIGHARONG og lainlaing kontra ang higpit nga managribal nga M.Lhuillier Kwarta Padala-Cebu Niños ug Misamis Oriental Meteors karong hapon sa pagsugod sa semi-finals best-of-three series sa Tournament of the Philippines (TOP) sa managlaing venue.

Ang Niños ni coach Raul “Yayoy” Alcoseba makigsangka sa Treston Laguna Stallions sa Cebu Coliseum samtang ang Meteors ni coach Jun Noel makigbatok sa Hobe Bihon-Taguig sa Xavier University gym sa Cagayan de Oro City.

Updates on President Benigno Aquino III's presidency

Tatawng nakabintaha gyud og dako ang Niños ug Meteors batok sa ilang tagsatagsa ka kontra tungod kay pabor man sila sa korte.

Apan wala kini nagpasabot nga bastabasta na lang malupig ang Stallions ug Hobe Bihon Taguig kay pulos man sab gyud naa sila’y ikabuga.

Ang Niños, nga maoy no.1 team sa eliminasyon, nakalusot sa semis pinaagi sa pagmakmak sa Gensan Warriors ni boxing champion Manny Pacquiao, 91-83, sa quarterfinals.

Sama sa naandan, magsalig ang Niños sa ilang mga ex-PBA nga sila si Stephen Padilla, Marlon Basco, Bruce Dacia, ug Warren Ybañez lakip na ni Ian Saladaga.

Ang Game 2 sa series ipahigayon ugma sa samang mga venue ug kon aduna deciding game, hayan motapon na kini sa balwarte sa Stallions ug Taguig.