DAKONG UWAW. Mo-abot pa nig pipila ka buwan usa moundang ang hisgot ug pagbasol sa atong kagamhanan sa dakong kapalpakan sa kapulisan sa pagkamatay sa walo ka turistang taga Hong Kong nga gi-hostage ni Rolando Mendoza.
Di lang makauuwaw ang nahitabo apan nagpakita usab sa kadakong kakulangan sa himan ang atong kapulisan ug labina sa kakuwang sa kahibalo sa pagnegusyar og usa ka tawong desperado sama ni Mendoza, nga natangtangan sa iyang pagka-pulis.
Ang tibuok Hong Kong nagmartsa sa miaging semana aron sa pagpalanog sa tibuok kalibutan sa ilang kalagot ug pagpangayog hustisya sa kamatayon sa walo ka turistang taga Hong Kong.
Gawas sa kapalpakan sa kapulisan, migawas pa gyud nga pulpol ang atong presidente tungod sa iyang pagpahiyom samtang gipangutana siya sa prensa mahitungod sa hitabo.
Ang iyang pahiyom nga wa tuyoa nakapalagot sa taga Hong Kong labi na sa ilang opisyales. Wa mahimuot ang taga Hong Kong bisan sa esplikasyon ni Pres. Noy Aquino.
Gani si Sen. Jinggoy Estrada gilabay sa iyang passport sa immigration officer sa Hong Kong ug si Kris Aquino gisiyagitan sa usa ka tawo nga taga Hong Kong.
Aron mahatagan og hustisya ang mga biktima nga hostage ni Mendoza kinahanglan ipagawas ang tinuod nga resulta sa imbestigayon nga gipatigayon karon sa Senado ug NBI sa way pagdapig-dapig.
Kon duna may sipyat ang kapulisan sa pagkamatay sa walo ka hostage ni Mendoza kinahanglan silotan ang nahingtungdan nga pulis. Anus-a pa kaha ang atong kapulisan makakat-on sa pagnegosyar sa usa ka problemado sama ni Mendoza
***
TRAPIKO. Ang problema sa trapiko sa dakbayan sa Lapu-Lapu nagpabilin gihapon bisag si Paz Radaza na ang mayor. Gani sa akong tan-aw wa hatagi ni Mayor Paz og pagtagad ang maong problema.
Sa oras sa ting trabaho ug ting uli, ang trapiko sa unang tulay nga nagkonektar sa Mandaue grabe kaayo. Gamay ra kaayo ni nga problema apan mahimong dako tungod kay gipasagdaan man lang.
Ang unang tulay usa ka two-way lane lamang. Apan tolo ka lumbay (usahay upat pa) ang mga sakyanan gikan sa Patalingjug ave. nga mosaka padung sa tulay. Kini maoy hinungdan nga maghuot ang mga sakyanan inig-abot sa tiilan sa tulay.
Aron di maghuot ang mga sakyanan sa tiilan sa tulay kinahanglan usa ra gyud ka lumbay sa sakyanan ang mopadung sa tulay. Kahibawo ko nga nakahibawo ani nga problema ang pulis sa trapiko. Kon nganong way gibuhat, wa na ko kahibawo ana.
Ang mga drayber sa traysikol ug PUJ badlungon kaayo. Ang lugar nga di angayan urongan adto hinuon mopasakay ug diskarga sa pasahero. Kon imong badlungon ang drayber mao pay masuko. Paet, ang sayop maoy isog.
Ambot og makamao ba kaha ni sila nga traffic enforcers manakop sa mga nakalapas sa lagda ug balaod sa trapiko.
Ingon ani usab ang problema sa dakbayan sa Mandaue. Gubot pas lukot ang trapiko sa Mandaue labina sa panahon padong sa trabaho ug pauli gikan sa trabaho. Ang mga traffic enforcer motan-aw lang sa mga kalapasan sa lagda ug balaod sa trapiko.
Ang pagpalabay sa mga kalapasan maoy usa sa mga hinungdan nga midaghan ang abusadong drayber sa PUJ ug traysikol, nga morag sila ra ang naggamit sa kadalanan. Bisag asa mo-urong, mopasakay ug mopakanaog sa pasahero.
Daghan pa tingale og dagkong bulohaton si Mayor Jonas Cortes sa City Hall kay morag nataligam-an man ang problema sa trapiko.
Karon nga mayoriya na ang iyang sakop sa konseho wa nay rason nga di siya makabuhat sa iyang gustong buhaton alang sa kausbawan sa dakbayan.
Matud pa ni Bise Mayor Glenn Bercede, sa dihang ako siyang gibisita sa iyang opisina, nga ilang ihatag sa katawhan sa dakbayan ang tanan nilang nabuhian nga pung sa panahon sa ilang pagkampanya. Dalia na bise kay daghan ang naghuwat.